Prokuroria e Posaçme kërkon dënimin me 63 vite burg në total për grupin e Habilajve, të akuzuar për trafik narkotikësh dhe grup të strukturuar kriminal.
Pas më shumë se tre vitesh hetime, SPAK i ka kërkuar gjykatës dënimin me 18 vite burg për Moisi Habilajn të cilësuar edhe si kreun e grupit kriminal. Ky i fundit është në kërkim nga autoritet italiane pasi u arratis nga arresti shtëpiak pak muaj më parë pasi gjykata ndryshoi masën e sigurisë nga arrest në burg në atë të arrestit shtëpiak.
Për të njëjtat akuza në pretencën e paraqitur përballë togave të zeza , prokuroria kërkoi dënimin me 15 vjet burg, për Nezar Seitin, Maridian Sulaj dhe Fatmir Minaj.
Gjithashtu SPAK ka kërkuar edhe konfiskimin e 22 pasurive të vëllezërve Moisi dhe Floarian Habilaj si dhe familjarëve të tyre që kap vlerën e 82 milionë 440 mijë lekëve të reja.
Për shkak se procesi është zhvilluar me gjykim të shkurtuar të pandehurit që janë dënuar edhe nga gjykata e Katanias në Itali, do të përfitojnë uljen e 1/3 së dënimit.
Ndërkohë për të njëjtën dosje, janë në kërkim 2 ish-zyrtarët e policisë së Vlorës, Gjergj Kohila dhe Sokol Bode. I vetmi që vijon të qëndrojë ne qeli është ish-drejtori I policisë së Vlorës, Jaeld Çela i dënuar me 3.4 vite burg për shpërdorim detyre, i cili u dorëzua pas disa kohësh në arrati. /abcnews.al/
