Real Madrid zhvilloi një ndeshje shumë të mirë, dominoi Liverpool në Madrid dhe fitoi 3-1 takimin e parë çerekfinal të Champions League. Portier i “Los Blancos”, Thibaut Courtois analizoi për mediat triumfin ndaj kampionëve të Anglisë.
“Jemi shumë të kënaqur me ndeshjen që zhvilluam. Liverpool është një skuadër e madhe, por u mbrojtëm shumë mirë. Ata patën fat te goli që shënuan, por ne reaguam mirë dhe realizuam edhe golin e tretë.
E dimë që do të jetë e vështirë në ndeshjen e kthimit, por besojmë se do të kualifikohemi. Ata janë tepër të fortë në fushën e tyre, por mund t’ia dalim të kalojmë në gjysmëfinale.
Sekreti ynë? E pranoj që prisja të bëja më shumë pritje, por u treguam fantastikë në prapavijë. E njohim shumë mirë njëri-tjetrin, kjo vjen nga puna e përditshme në stërvitje.
Mëkat që pësuam atë gol, pasi ishim shumë të organizuar në mbrojtje. Jam shumë i lumtur që shënuan Vinicius dhe Asensio. Ka raste kur kritikohemi shumë, por njerëzit e harrojnë që po luftojmë në të gjithë frontet.
Duam të fitojmë trofe. Tani është radha të tregojmë potencialin tonë në El Clasico, më pas vjen ndeshja e kthimit kundër Liverpool“, deklaroi portieri belg i kampionëve të Spanjës. /abcnews.al
