Real Madrid fitoi 1-3 në fushën e Celta Vigos dhe vijon t’i bëjë presion Atleticos së vendit të parë. Ekipi i Simeones kryeson me vetëm 3 pikë më shumë se “Los Blancos”, por ka luajtur një ndeshje më pak.
Trajneri i Realit, Zinedine Zidane vlerësoi paraqitjen e ekipit të tij. Lojë e bukur, efikasitet përpara portës kundërshtare dhe dominim i kundërshtarit. Në fund elozhe për Karim Benzema, autor i një dygolëshi në fitoren e sotme.
“Luajtëm një ndeshje të kompletuar, të cilën e interpretuam shumë mirë. E nisëm shumë mirë takimin dhe ua fshehëm topin kundërshtarëve. E vetmja gjë negative ishte goli i pësuar në fundin e pjesës së parë.
Më pas vuajtëm disi në pjesën e dytë, por e merituam fitoren. Është e rëndësishme të vazhdojmë përpara në këtë mënyrë. U treguam të aftë kur e kishte topin Celta Vigo, i mbyllëm të gjitha hapësirat.
Benzema? Është një luks të shohësh Karim për njerëzit që e duan futbollin. Ne po e shijojmë në maksimum atë që po dhuron në fushën e blertë.
Nuk arrij ta kuptoj pse nuk e grumbullon kombëtarja e Francës, por më mirë për mua kështu“, deklaroi trajneri i kampionëve të Spanjës. /abcnews.al
