Moment shumë i mirë për Arsenalin. Të enjten erdhi fitorja 1-3 në Europa League kundër Olympiacos, ndërsa sot triumfi 2-1 në derbin kundër “armiqve” të Tottenham. Trajneri i “Topçinjve”, Mikel Arteta analizoi për mediat suksesin ndaj Spurs.
“Skuadra pati merita të mëdha për fitoren e sotme. Nuk ishte kaq e thjeshtë të luanim me këtë ritëm dhe intensitet dy ditë pas ndeshjes së Europa League. Ishte zhgënjyese të kalonim në disavantazh, pasi po luanim shumë mirë.
Më pëlqeu reagimi i djemve ndaj një Tottenhami që të lejon shumë pak hapësira, e përmbysëm ndeshjen dhe e merituam fitoren. Dhjetë minutat e fundit ishin shumë të vështira, ndër më të këqijat që kemi luajtur.
Nuk e menaxhuam ndeshjen, nuk e menaxhuam presionin dhe duhet të kishim bërë shumë më mirë. Kjo është një nga gjërat që duhet të përmirësojmë, pasi ishim me një lojtar më shumë se ekipi kundërshtar“, theksoi Mikel Arteta. /abcnews.al
