Martin Odegaard është lojtari më i ri i Arsenalit. Një përforcim me vlera për klubin londinez, që ka përforcuar skuadrën me një lojtar të talentuar dhe me shumë potencial. Gunners arritën akordin me Real Madrid për huazimin me të drejtë blerje të 22-vjeçari norvegjez, i cili nuk po përfitonte minuta në kryeqytetin spanjoll (vetëm 7 ndeshje këtë sezon, shumica si zëvendësues).
Mesfushori ofensiv ndihet i emocionuar për nisjen e aventurës së re, teksa thekson se e dashuron kampionatin anglez gjatë prezantimit përpara tifozëve të rinj. “Jam rritur duke parë ndeshjet e Premier League. Mendoj se është kampionati më i rëndësishëm në botë, gjithmonë e kam pasur ambicien dhe dëshirën për të ardhur një ditë këtu. Gjithmonë e kam admiruar stilin e lojës së Arsenalit dhe atmosferën rreth këtij klubi.
Është një ëndërr e realizuar veshja e kësaj fanelle“, deklaron futbollisti nordik. Një koment për Odegaard dha edhe trajneri Mikel Arteta: “E njohim mirë, është një lojtar i ri, por ka kohë që luan në nivele të larta. Martin do të na sigurojë mundësi cilësore në sulm. Jemi të emocionuar që është bashkuar me ne, mezi po presim ta integrojmë sa më shpejt në ekipin tonë“. /abcnews.al
