Seanca maratonë në Kuvendin e Shqipërisë ka përfunduar pas 12 orësh me votimin e ligjit për Teatrin Kombëtar. Opozita e ka kundërshtuar vendimin e mazhorancës edhe gjatë procesit të votimit. Në shenjë revolte ata bllokuan foltoren dhe goditën kryeministrin Edi Rama me kartonët e kuq.
As pas 12 orëve debatesh e diskutimesh nuk ia ndërruan mendjen njëri-tjetrit.
Shprehja e fundit e kundërshtimit të opozitës brenda sallës së parlamentit ishte rrethimi i foltores me kartonat e kuq në duar.
Por mazhoranca nuk ndalet në vendimin e saj. Me 75 vota pro miratohet prishja e Teatrit Kombëtar.
Pakica në parlament e braktis sallën, duke i hedhur kartonët e kuq drejt kryeministrit Edi Rama.
Jashtë godinës së Kuvendit, mbështetësit e mosrealizimit të projektit të qeverisë nuk u surprizuan nga vendimi.
Ata vazhduan të bëjnë thirrje për ruajtjen e godinës së vjetër, këtë herë ia drejtojnë Presidentit të Republikës dhe përfaqësuesëve të institucioneve ndërkombëtare./abcnews.al
