Kandidati demokrat Joe Biden është afër 270 votave elektorale, teksa tani ka 264. Gjashtë shtete mbeten shumë afër përfundimit të numërimit. Presidenti Trump vijoi akuzat për manipulim dhe kërkoi ndërprerje të numërimit, por gjykatat e rrëzuan. Joe Biden kërkoi durim ndërsa votat vazhdonin të numëroheshin.
“Ne nuk kemi dyshim se kur të përfundojë numërimi Harris dhe unë do të shpallemi fitues. Kështu që, unë u kërkoj të gjithëve që të qëndroni të qetë. Procesi po vijon. Numërimi është duke përfunduar. Ju falënderoj të gjithëve për durimin tuaj“tha Biden.
Në një postim në Twitter, ai tha se fushatën e bëri si një demokrat krenar, por do të qeverisë si President amerikan, pa dallime kuq apo blu. “Më lejoni të jem i qartë: Unë bëra një fushatë si demokrat krenar, por unë do të qeveris si një president amerikan” shkruan ai.
Numërimi vazhdon në Pensilvani, Alaska, Arizona, Georgia, Nevada dhe Karolinën e Veriut. Sekretari i shtetit të Pensilvanisë tha se fituesi mund të dilte brenda pak orëve dhe nëse Joe Biden triumfon ai do të arrinte dhe kalonte numrin magjik të 270 votave elektorale që i duhen për të shkuar në Shtëpinë e Bardhë. / db/Abcnews.al
