Inter-Milan, nesër prej orës 18:00, do të tërheqë vëmendjen e tifozëve anembanë Italisë dhe botës. Derbi i Madonnina parashikohet të jetë interesant, edhe pse të dyja ekipet nuk janë të plota. Trajneri Stefano Pioli ka dalë sot para mediave dhe i është përgjigjur interesimit të gazetarëve.
NDESHJA – “Milani ka identitetin dhe mënyrën e vet të lojës. Në punën tonë testet nuk mungojnë kurrë dhe ky është një test i rëndësishëm dhe i vështirë. Kisha pak kohë në dispozicion, por kjo vlen edhe për kundërshtarin. Rivaliteti ndihet, edhe pse fatkeqësisht do të luhet pa tifozë. Gjithsesi është një ndeshje që ndjehet dhe do të jetë një përballje e vërtetë. Duhet të përgatitemi për këtë ndeshje në mënyrën më të mirë të mundshme dhe të luajmë më mirë se kundërshtari.
Rruga jonë nisi një vit më parë dhe kemi hapësirë për t’u përmirësuar. E respektojmë kundërshtarin, që shikohet si pretendent për titullin kampion. Ne hyjmë në fushë me bindje të plotë për të dhënë më të mirën. Shpresoja të vinim në derbi pas tre fitoreve dhe me sigurimin e kualifikimit në grupet e Europa League. Kemi ardhur në gjendje të mirë, por njëjtë ka ndodhur edhe me kundërshtarin tonë. Fitorja kundër Interit do të na jepte entuziazëm, por e shohim vetëm si një ndeshje të radhës. Mendojmë të rritemi dhe të përmirësohemi”, tha Pioli.
EMRAT E VEÇANTË – “Ibra ka pasur një problem, por e kam gjetur si zakonisht, të qeshur, me vullnet dhe të vendosur. Ai është mirë, por është e qartë se ka vetëm një javë stërvitje. Gjithsesi është gati për lojë. Kthimi i tij është një stimul më shumë për ne. Rebiç? Po flasim për një lojtar vendimtar në shumë ndeshje, një element i rëndësishëm që na mungon. Gjithsesi kemi edhe lojtarë të tjerë në dispozicion. Ai nuk do të jetë në dispozicion për nesër dhe për ne është e rëndësishme që është mirë. E ka shmangur operacionin dhe do të ketë një kontroll tjetër për të kuptuar kohën e rikuperimit.
Hauge? Më ka krijuar përshtypje të shkëlqyeshme, është një djalë i vëmendshëm dhe ka karakteristika të rëndësishme për të luajtur. Momentalisht e lodh pak gjuha. Kjaer? Kontributi që ai po jep brenda dhe jashtë fushe është sigurisht i një niveli të lartë. Po flasim për një profesionist, një djalë inteligjent, Edhe kthimi i kapitenit na lejon të rigjejmë ato mekanizma mbrojtës mbi të cilët kemi punuar”.
INTERI – “Jam dakord që diferencat me Interin janë zvogëluar, por këtë duhet ta tregojmë në fushë. Nga derbi i fundit kemi fituar më shumë përvojë, jemi rritur shumë, por është e kotë të mendosh për të kaluarën. Le të shohim të tashmen.
Tani kemi një identitet më të saktë, e njohim më mirë sistemin tonë të lojës. E kemi përmirësuar nivelin tonë. Çdo ndeshje shërben për t’u përmirësuar, Këtë herë përballemi me një kundërshtar të mirë. Humbja e fundit në derbi ishte e rëndësishme. E kuptuam se mjafton një shpërqendrim për të marrë shuplaka. Nga ajo ndeshje ne ndërtuam momentin tonë të mirë”.
“Çfarë kam ndryshe nga Conte? Nuk kam asnjë zili për Conten. Unë e dua punën time. Kolegët i njoh për shkak se studiojmë strategjitë e tyre, por jo personalisht. Ka shumë gjëra që nuk i di, për të dhënë një gjykim”, deklaroi Pioli në konferencë. /abcnews.al
