Italia nuk shkoi më shumë se një barazim pa gola në takimin e mbrëmjes së kaluar ndaj Polonisë në Gdansk. Djemtë e Roberto Mancinit e dominuan sfidën e Nations League, por nuk ia dolën të dërgonin topin në rrjetë.
Trajneri i kombëtares së kaltër analizoi ndeshjen, duke theksuar se fusha e keqe ndikoi jo pak. Në prononcimin e dhënë për Rai Sport, Mancini u ndal edhe te rastet e shumta që u humbën përpara portës kundërshtare.
“Për fatin tonë të keq humbëm shumë raste, por na penalizoi disi edhe fusha. Ishte në gjendje të mjerueshme. Nuk u shpërblyem me rezultatin e duhur, por jemi të kënaqur me performancën që bëmë.
Fusha nuk është alibi, por ndikoi që të kryenim shumë gabime. Luajtëm gjithë kohën në sulm, krijuam shumë, por nuk arritëm te goli. Pjesën e parë duhet ta mbyllnim 0-2 ose 0-3, por nuk duhet ta humbasim qetësinë“, deklaron Mancini.
Ndërkohë, tre lojtarë të tjerë të Italisë U21 janë infektuar nga koronavirusi. Sipas një njoftimi të FIGC (Federata Italiane e Futbollit), tre futbollistë të Shpresave të Italisë (emrat nuk zbulohen) kanë rezultuar pozitivë me Covid-19.
Më parë u prekën Matteo Gabbia i Milanit dhe portieri Alessandro Plizzari. Italia U21 pret moshatarët nga Irlanda ditën e nesërme (17:00), sfidë shumë e rëndësishme për kualifikimin në Euro 2021. /abcnews.al
