Një tragjedi ka ndodhur në familjen Qafleshi në Prizren, pasi brenda tre ditësh dy djemtë e kësaj familje kanë ndërruar jetë nga koronavirusi. Vëllezërit Shemsedin dhe Avdurrahim Qafleshi 57 dhe 60-vjeç nuk kanë arritur ta fitojnë betejën me koronavirusin. Të dy ishin duke u trajtuar në Spitalin Rajonal të Prizrenit. Lidhur me rastin Gazeta Express ka kontaktuar me kryetarin e Dragashit, Shaban Shabani.
“Para 3 ditësh ka ndërruar jetë njëri prej vëllezërve, tani pas dy ditësh vëllai tjetër. Ata kanë qenë duke u trajtuar në Spitalin Rajonal të Prizrenit, fatkeqësisht nuk e kanë përballu luftën me koronavirusin”, tha Shabani.
Ndërkohë, komuna e Dragashit i ka dërguar telegram ngushëllimi familjes Qafleshi, me rastin e ndarjes nga jeta të dy vëllezërve. “Me pikëllim të thellë e morëm lajmin e kobshëm për ndarjen e parakohshme nga jeta të vëllezërve nga Bellobradi, Shemsedin dhe Avdurrahim Qafleshi të prekur nga COVID-19. Ngushëllime të sinqerta familjes, miqve të të ndjerëve, shokëve dhe gjithë qytetarëve. Ju qoftë i lehtë dheu i Kosovës”, thuhet në ngushëllimin e tyre./mv. abcnews.al
