Toni Kroos është prej vitesh një prej mesfushorëve më të mirë në botë. Këmbë fantastike, saktësi e frikshme dhe inteligjencë superiore. Mesfushori gjerman është pjesë e Real Madrid prej korrikut të vitit 2014 dhe ka fituar gjithçka në “Santiago Bernabeu”.
Trajneri i Realit, Zinedine Zidane thur elozhe për 30-vjeçarin në prononcimin e dhënë për Real France, duke zbuluar cilësinë më të veçantë të Kroos dhe duke pranuar se do të krenohet me faktin që ka punuar me të.
“Toni nuk është një tip që flet shumë. Ai është i qetë dhe një djalë i rezervuar, flet vetëm kur duhet dhe është e nevojshme. Ai bisedon me të gjithë: trajnerin, drejtuesit dhe kolegët. Nuk ndalon më kur nis e flet.
Kam parë shumë diskutime ku pjesëmarrja e tij ka qenë thelbësore. Toni është një futbollist aq i mirë sa mund të luajë si nr 6, si qendërmesfushor dhe si numër 10. Virtyti i tij kryesor është qetësia, nuk nervozohet kurrë.
Është e mrekullueshme mënyra se si luan me të dy këmbët. Jeta e tij është futbolli dhe familja, pjesa tjetër nuk kanë rëndësi. Do të kujtohet si një lojtar spektakolar, një ndër më të mirët në planet në rolin e tij.
Kur mora drejtimin e Realit, isha shumë i lumtur që do të punojë me Toni Kroos. Sigurisht, do të them gjithmonë që kam stërvitur lojtarë si Sergio Ramos, Cristiano Ronaldo, Gareth Bale, por edhe Toni Kroos“, thekson Zidane. /abcnews.al
