Dinamo po tenton të përforcohet gjatë merkatos dhe plani i tyre është që të marrin lojtarë të spikatur të Kategorisë së Parë. Nga Burreli u mor Welber Almeida Santos, ndërsa më pas “Blutë” siguruan firmat e dy lojtarëve të Pogradecit, Artion Alillari dhe Kevi Berberi.
Ditën e sotme, Dinamo ka konfirmuar një tjetër lëvizje dhe bëhet fjalë për një mesfushor që ka qenë edhe pjesë e Superiores, me skuadra si Skënderbeu e Teuta. Klaudio Hyseni lë Tërbunin dhe transferohet në kryeqytet.
“Klaudio Hyseni që prej ditës së sotme është zyrtarisht lojtar i Dinamos. Mesfushori 26-vjeçar i cili ka luajtur edhe në superiore me Skënderbeun e Teutën, si dhe me disa ekipe në kategorinë e parë, ka zgjedhur Blutë dhe projektin e presidentit Pontrelli për vazhdimësinë e karrierës.
Ai ka hedhur edhe firmën mbi kontratën që e mban të lidhur për dy sezonet e ardhshme me fanellën dinamovite. FK Dinamo i uron mirëseardhjen dhe i uron suksese me fanellën e 18 herë kampionëve të Shqipërisë”, njofton Dinamo. /abcnews.al
