Një ndër artistët që erdhi fuqishëm këtë verë ishte padyshim Mozzik. Reperi bëri një premtim duke u shprehur se 2020-ta do të ishte vetëm e tij. Aktualisht sapo kemi hyrë në muajin gusht dhe duket se Mozzik po e mban premtimin.
Përgjatë muajit që lamë pas, reperi solli tre këngë që rezultuan shumë të suksesshme, nga “Madonna”, dhe bashkëpunimi me Kidën “Paranoja-Pishman”, tek “Baby”, që arritën të renditeshin në toplistën e më të dëgjuarave.
“Madonna”, kënga e parë e lançuar për këtë sezon, aq sa e kritikuar për shkak të përmbajtjes së tekstit që shkaktoi polemika tek artistët dhe qytetarët, rezultoi e suksesshme duke numëruar më shumë se 18 milion klikime në Youtube.
Gjatë javëve të fundit, reperi ka kryesuar klasifikimin e 10 artistëve më të dëgjuar, duke u kthyer kështu në artistin më të sukseshëm të momentit në vend. Ndërkohë, Mozzik publikoi me 31 Korrik albumin “MozzArt” dhe mbetet për të parë ndikimi që do të ketë tek publiku. /abcnews.al/
