Lamia, Volos NFC dhe Panaitolikos duan Winful Cobbinah, ky ishte lajmi që një ditë më parë u raportua nga Sports World Ghana. Mesfushori me tipare sulmuese është në qendër të vëmendjes për shkak të sezonit të mirë që ka bërë me Tiranën.
Autori i shtatë golave dha kontribut të vyer në fitimin e titullit kampion dhe normalisht ofertat nuk i mungojnë. Gjithsesi te Tirana kanë menduar të shuajnë zërat e merkatos dhe përmes një reagimi bëjnë me dije se Cobbinah ka edhe një vit kontratë me ta.
“Klubi i Futbollit Tirana kërkon të qartësojë statusin e lojtarit Winful Cobbina. Duke marrë shkak nga lajmet e pavërteta që qarkullojnë në lidhje me largimin e tij, bëjmë me dije se kontrata e mesfushorit vijon të jetë në fuqi deri në fund te vitit të ardhshëm.
I lutemi portaleve të jenë të saktë me informacionet që përcjellin për publikun e gjerë dhe të bazohen në lajmërimet zyrtare të klubit”, shkruhet në reagimin e bërë nga klubi i Tiranës, që për shërbimet e Cobbinah ka paguar 30 mijë euro për kartonin dy vite më parë. /abcnews.al
