Sot u zhvilluan ndeshjet e radhës në Kategorinë e Parë. Besëlidhja dhe Korabi nuk gabuan në sfidat e sotme shtëpiake në grupin A. Lezhjanët iu falën dygolëshit të Hoxhës në minutat e fundit për të mposhtur Kastriotin e rikthyer në Superiore.
3-0 triumfoi Korabi ndaj Erzenit. Edhe në ndeshjen e zhvilluar në Peshkopi, golat u shënuan në pjesën e dytë. Besëlidhja vijon të renditet e dyta (pozicion që të dërgon në duelin “play-off” me ekipin e dytë të grupit B) me 38 pikë, ndërsa Korabi qëndron i treti me tre pikë më pak.
Në këtë grup u luajtën edhe dy sfidat e “play-out”. Dinamo iu fal golit të Kolgegës në minutën e 70-të për të siguruar një trepikësh jetik në Burrel. 0-1 fituan kryeqytetasit jashtë fushe, duke parakaluar Tërbunin. Ndeshja tjetër midis Egnatias dhe Veleçikut u mbyll pa gola.
Në dy duelet “play-off” të grupit B u shënuan 12 gola. Apolonia ka siguruar ngjitjën në Superiore dhe nuk nënvlerësoi aspak përballë Pogradecit, në garë për vendin e dytë. 2-2 u mbyll sfida e luajtur në “Loni Papuçiu”, rezultat nga i cili përfitoi Lushnja.
Lagunarët shënuan pesë gola në fushën e Besës, fituan 3-5 dhe u rikthyen në shtëpi me tre pikë. Lushnja renditet e dyta me 44 pikë, ndërsa Pogradeci ndjek me një pikë më pak. /abcnews.al
