Superiorja rikthehet nesër, kurse sot është dita për ndeshjet e Kategorisë së Parë dhe të Dytë. Prej orës 17:00 nisin 10 ndeshje. Në të Parën zbresin në fushë ekipet që garojnë për të siguruar qëndrimin në kategori. Dinamo është pushim në grupin A dhe sytë janë në Burrel e Rrogozhinë, ku luhen Burreli-Veleçiku dhe Egnatia-Tërbuni.
Në grupin B luhen tre takime, ku veçohet derbi Elbasani-Turbina, skuadra që rrezikojnë rënien në të Dytën. Në Bilisht Devolli pret Ilirinë e dobësuar prej largimeve, kurse Oriku pret skuadrën e Shënkollit, për të përmbyllur sfidat e kësaj jave.
Në Kategorinë e Dytë Vora dhe Luzi do kërkojnë fitoret e radhës, për të garuar deri në fund për vendin e parë. E para përballet me Mirditën, kurse kavajasit luajnë në transfertë me Tiranën B. Partizani B-Klosi është një tjetër takim që luhet në kryeqytet, kurse në program për sot janë edhe përballjet Ada-Internacional dhe Gramshi-Spartaku. /abcnews.al
