Sulmuesi i Barcelonës, Antoine Griezmann, ka folur sot sa i takon rifillimit të La Ligas. Barça do të luajë kundër Mallorca në transfertë të shtunën (22:00) dhe Griezmann, duket gati. Madje, kampioni i botës u shpreh optimist dhe për titullin kampion në Spanjë.
“Në nivelin personal, më kanë bërë shumë mirë këto pushime. Kisha nevojë për pak qetësi. Prej 5 vitesh nuk kam bërë kurrë kaq shumë pushim dhe si mendërisht, ashtu edhe fizikisht, jam mirë. Dua që të jem një lojtar i rëndësishëm për skuadrën, në fushë, ashtu edhe jashtë saj. Dua ta shijoj futbollin dhe shokët e skuadrës.
Ka kaluar shumë kohë nga ndeshja e fundit zyrtare. Jemi përgatitur mjaft mirë për këtë sfidë, sepse është shumë e rëndësishme për t’i nisur mirë këto 11 finale. Kemi shumë dëshirë dhe shpresojmë që gjërat të shkojnë mirë. Titulli? I kemi kartat në dorën tonë. Duhet të bëjmë 11 ndeshje të mira dhe kështu do të dalim kampionë”, u shpreh Griezmann./abcnews.al
