Bundesliga është kampionati i parë evropian që do të rikthehet në fushë. Skuadrat gjermane do të rinisin duelet mes tyre në datë 16 maj dhe ky sezon do të përfundojë në datën 28 qershor, vendim që është përshëndetur nga presidenti i UEFA-s.
Aleksander Ceferin shfaqet entuziast në një prononcim për Allgemeine Zeitung, aty ku vlerëson nismën e shtetit gjerman dhe beson fort që rinisja e Bundesligës do të ndikojë për mirë edhe në rifillimin e përfundimin e sezoneve të futbollit në shtete të tjera.
“Ishte rezultat i dialogut konstruktiv dhe një planifikimi të kujdesshëm midis autoriteteve të futbollit dhe politikanëve. Kam besim se Gjermania do të na sigurojë të gjithëve një shembull brilant sesi mund ta rikthejmë futbollin, me gjithë eksitimin, emocionet dhe paparashikueshmërinë e tij.
Është një lajm i shkëlqyer që autoritetet gjermane kanë rënë dakord për rifillimin e Bundesligës. Më duket një hap shumë pozitiv, njerëzit mund t’i rikthehen jetës së tyre me optimizëm dhe u uroj suksese të gjithëve”, deklaron Ceferin. /abcnews.al
