Presidenti i Federatës Shqiptare të Futbollit, Armando Duka, ka bërë një video-konferencë sot së bashku me UEFA-n dhe 54 Federatat e tjera anëtare, ku kanë diskutuar për mbarëvajtjen e sezoneve aktuale, që janë ndërprerë momentalisht për shkak të Koronavirusit. Duka foli për miqësoret e Shqipërisë, VAR-in në Superiore, kush del kampion (Luftëtari, me batutë normalisht), kur vazhdon kampionati dhe plani qe ka, gjendja e Edi Rejës, pasi është në karantine, edhe disa tema të tjera.
“Ky ka qenë propozimi i sotshëm i UEFA-s, apo vendimmarrja me kaq njohuri sa ka Europa në lidhje me përhapjen e virusit. Parashikohet që në prill të fillojnë aktivitet sportive dhe të gjitha kampionatet, të mbarojnë brenda qershorit, në mënyrë që të mos ndikohen kualifikueset Champions League dhe Europa League. Edhe kampionati europian shtyhet vitin tjetër, për të mos rriskuar për një kampionat pa tifozë.
Duke pasur parasysh edhe informacionet që UEFA ka nga Organizata Botërore e Shëndetësisë. Fundi është: Nëse do të kemi ndonjë të papritur, do të ketë vendime të tjera dhe lajme të tjera. Ne presim që të respektohet ky skenar.
Patjetër që UEFA kërkoi mendimet e 55 shteteve anëtare për zhvillimin normal të aktiviteteve sportive. Presim që në prill të ketë një njoftim nga UEFA për rifillimin e aktiviteteve, gjithmonë nëse përhapja dhe kontrolli i këtij virusi, janë sipas parashikimit.
Edi Reja? Trajnerët kryesisht në të gjithë botën ishin të interesuar që t’i zhvillonin ndeshjet miqësore të marsit. Por fatkeqësisht, janë të detyruar të gjithë të jenë në karantinë dhe të respektojnë kushtet e vëna nga qeveritë respektive dhe Reja po respekton kushtet që ka vënë shteti italian. Unë personalisht jam i karantinuar pjesërisht, pasi jam i detyruar të lëviz për shkak të angazhimeve.
Për momentin nuk kemi kampionat në Shqipëri, po mendojmë për të ardhmen, si do të jenë aktorët e futbollit në Shqipëri, a do ta kenë të vështirë për t’u rikthyer në ritmet e garës pas këtij izolimi. Sa kanë punuar futbollistët në mënyrë individuale, sa shpejt do të përshtaten për të filluar kampionatin? Kështu që nuk mund të flasim për një kampionat që realisht, është në kushte anormale, në kushtet e një epidemie.
Verdiktet nëse mbyllet sot sezoni? Këtu pastaj do të futemi në hamendësime. Sot, në kongresin elektronik të UEFA-s, u qartësuan gjërat. Jemi në këtë skenar që u miratua, pas kongresit u bë edhe një mbledhje e Komitetit Ekzekutiv. Ne do të mblidhemi për të marrë një vendim tjetër nëse situata nuk përmirësohet. Unë shpresoj që t’i rikthehemi sa më shpejt jetës së shëndetshme dhe sa më shpejt futbollit. Humbjet financiare në Shqipëri? Normale që nuk është mirë, por gjithsesi duhet ta përballojmë. Por që do të ketë impakt ekonomik, patjetër që po. Ka pasur deri më tani, do të ketë edhe më shumë në të ardhmen, pasi po flasim për njerëz që futen në karantinë, punonjësit e kompanive, bizneseve, edhe futbollistët. Ka ndeshje të pa-luajtura, ka ndeshje pa tifozë. Ka impakt negativ, normalisht.
Miqësoret e Shqipërisë? Kishim dy miqësore me San Marinon dhe Slloveninë, por jemi detyruar të mos luajmë. Tani duhet të gjejmë mundësinë për të luajtur disa ndeshje para se të rikthehemi në UEFA Nations League. Mendoj se jemi kandidatë seriozë për të pritur finalen e Conference League në vitin 2022, në Air Albania Stadium. Ne dhe Greqia jemi ndër kandidatët seriozë.
Ne kemi shtuar përgatitjet për sistemin VAR, që është pothuajse i detyrueshëm për të gjitha kampionatet. Kemi filluar trajnimet, kemi filluar projektin teknik të investimeve teknike, për IT, edhe sistemeve tjera, me objektivin që sezonin e ardhshëm, të vendosim në funksion këtë sistem dhe në 2022/23, të kemi VAR në të gjithë Superioren. Kampione e Shqipërisë? Gjirokastra (qesh)”, përfundoi Duka./abcnews.al
