Kryetari i Partisë Demokratike Lulzim Basha përmes një njoftimi në rrjetet sociale thotë se qeveria duhet t ë ndalë propagandën dhe të marrë masa konkrete për kontrollin e qytetarëve që vijnë nga Italia.
Basha thotë se ndërkohë që Shqipëria duhet të përballet me rrezikun potencial të prekjes nga Korona virusi, mijëra qytetarë të tjerë, ndodhen në kushte të mjerueshme hijeno-sanitare, për shkak të tërmetit të 26 nëntorit.
Neglizhencë kriminale, e ka quajtur Basha humbjen e kohës me propagandë, kur duhen marrë masa për strehimin e banorëve që jetojnë në çadra, të cilët janë në gjendje të rënduar shëndetësore, dhe kanë mungesa të theksuara në ushqime.
Detyra e qeverisë, shkruan Basha, është të sigurojë kushte dhe jo të bëj show dhe propagandë.
Postimi i plotë:
“Qeveria duhet të ndalë menjëherë propagandën dhe të marrë masa konkrete për kontrollin e qytetarëve që vijnë nga Italia, kryesisht nga rajonet ku corona virusi ka përhapjen më të madhe.
Këto masa nuk mund të jenë show televiziv, por kontrolle të plota në të gjitha pikat hyrëse në Shqipëri. Është urgjent hartimi dhe shpallja e planit të masave dhe informimi i qytetarëve si duhet të veprojnë në rast të dyshimit se janë të prekur nga corona virus.
Ndërkohë që Shqipëria ndodhet përballë rrezikut potencial të prekjes nga corona virus, mijëra bashkëqytetarë ndodhen në kushte të mjerueshme për shkak të tërmetit të 26 nëntorit. Në mungesë të një strehe ata jetojnë ende në çadra ose janë rikthyer në banesat e dëmtuara, në kushte aspak të favorshme higjenosanitare dhe me mungesa të theksuar në ushqime.
Është neglizhencë kriminale të humbet akoma kohë, kur duhen marre masa urgjente për strehimin apo sigurimin e konteniereve për banorët që jetojnë në çadra, çka ka sjellë dhe gjendje të rënduar shëndetësore dhe kushte aspak të përshtatshme higjeno-sanitare për ta.
Njerëzit janë të shqetësuar me të drejtë, ndaj është koha që të flasin mjekët dhe të izolohet propaganda.
Dhe njëherë u bëj thirrje qytetarëve që të mos neglizhojnë asnjë shenjë rëndimi apo përkeqësimi të shëndetit të tyre por t’u drejtohen mjekëve dhe specialistëve të fushës. Ne kemi personel të shkëlqyer mjekësor që nuk kërkon asgjë më shumë se plotësimin e kushteve dhe nevojave për të përballuar çdo situatë
Detyra e qeverisë është të sigurojë këto kushte dhe jo të bëjë show dhe propagandë. Jam i bindur se nëse vihen në dispozicion mjetet e nevojshme, mjekët tanë do të përballojnë me sukses çdo situatë që mund të krijohet”./abcnews.al
