Juventusi udhëton nesër drejt Spalit për t’u ndeshur me skuadrën vendase. Bardhezinjtë nuk ia kanë dalë të fitojnë në këtë fushë në dy vitet e fundit dhe atmosfera në “Paolo Mazza” pritet të jetë e zjarrtë.
Për të nxehur atmosferën kanë menduar ultrasit vendas me anë të një postimi në rrjetet sociale. “Të shtunën stadiumi do të jetë i mbushur plot, kështu që, është e kotë të fshihemi pas gishtit, të pranishëm do të jenë edhe shumë tifozë okazionalë që nuk do të vijnë në stadium për Spalin tonë. U kërkojmë këtyre tifozëve që të tregojnë respekt dhe mos ta harrojnë faktin që ‘Paolo Mezza’ është shtëpia jonë.
Nuk duam të shohim shalle bardhezi apo çdo gjë tjetër me këto ngjyra, brenda dhe përpara zonës ku qëndrojmë ne. Përpara se të futeni në shtëpinë e dikujt, sigurohuni t’i respektoni rregullat. Sigurisht që kjo deklaratë nuk ka lidhje me sektorin e tifozëve miq“, përfundojnë ultrasit e Spal. /abcnews.al
