Ministri i Jashtëm dhe Punëve të Shqipërisë, Gent Cakaj, ka reaguar me kritika ndaj deklaratave të Presidentit të Serbisë, Alekdandër Vuçiç për mohimin e masakrës së Reçakut. Ndërkohë Cakaj e ka krahasuar Vuçiç me politikanin nazist gjerman, Paul Joseph Goebbels, i cili drejtonte Ministrinë e Propagandës dhe që ishte një prej bashkëpunëtorëve më të afërt të Adolf Hitlerit..
Pa këtij krahasimi ka reaguar menjëherë në shenjë proteste, Ministria e Punëve të Jashtme të Serbisë.
“Joseph Goebbels i propagandës së Millosheviqit tani është shndërruar në kampion të mohimit, nënvlerësimit dhe trivializmit të krimeve të luftës. Skandaloze”, tha Cakaj.
Pas kësaj deklarate MPJ serbe ka dërguar një notë proteste në adresë të Ambasadës së Shqipërisë në Beograd, duke e quajtur si të turpshëm një krahasim të tillë.
Në letrën e protestës, Serbia shprehet se deklarata të tilla nuk kontribuojnë në përmirësimin e raporteve Beograd-Tiranë, ndërkohë presin nga Republika e Shqipërisë që të distancohen nga deklarimet e Cakajt.
“Ministria e Punëve të Jashtme të Republikës së Serbisë shpreh respektin e saj ndaj ambasadës së Republikës së Shqipërisë në Beograd dhe shpreh protestën më të ashpër me rastin e deklaratës së turpshme të Ushtruesi të Detyrës së Ministrit për Evropë dhe Punë të Jashtme, Gent Cakaj, i cili presidentin e Republikës (Serbisë) e krahason me Goebbelsin”, thuhet në letër të dërguar më 7 dhjetor 2019, një ditë pas deklaratës së Gent Cakajt.
Ndër të tjera Serbia ka kërkuar nga Republika e Shqipërisë që t’i dënojë deklarime të tilla dhe të distancohen nga to.
“Deklarata të tilla në asnjë formë nuk i kontribuojnë përpjekjeve që jemi duke i bërë për avancimin e raporteve të dy vendeve tona dhe marrëdhënieve të përgjithshme në rajon.
MPJ e Serbisë pret që Shqipëria t’i dënojë këto deklarata dhe të distancohet nga to. MPJ e Serbisë shfrytëzon këtë rast që Ambasadës së Shqipërisë t’ia ritheksojë respektin e lartë”, përfundon letra.
