Alexis Saelemaekers është një nga investimet e Milanit në merkaton e janarit. 20-vjeçari belg erdhi nga Anderlecht dhe aktivizohet në disa role. Lojtari i Belgjikës U21 luan si mesfushori i djathtë, sulmues i djathtë dhe mesfushor ofensiv. Drejtuesit e kuqezinjve janë të bindur për cilësitë e belgut, teksa ky i fundit tregon futbollistin që e frymëzon dhe pse zgjodhi Milanin në një prononcim për Milan TV.
“Mendoj se Zlatan Ibrahimovic është një futbollist dhe person nga i cili duhet të frymëzohesh për mentalitetin e fortë dhe dëshirën për të fituar. Frymëzohem shumë nga Ibra. Pse bëra këtë zgjedhje? Milani është një klub madhështor, çdo futbollist ëndërron të luajë në një klub të tillë.
Jam shumë i lumtur që u bëra pjesë e projektit të kuqezinjve. Objektivat e mia janë të qarta, do të jap maksimumin çdo javë për Milanin, në stërvitje dhe në ndeshje. Dua t’u demonstroj tifozëve dëshirën time të madhe për të ndihmuar ekipin në çdo moment“, deklaroi Saelemaekers. /abcnews.al
