Loading ...
Detaje të reja tronditëse janë zbardhur lidhur me masakrën në Krakovë të Polonisë, ku autori i dyshuar, 24-vjeçari Michal Oksinski, dyshohet se vrau fillimisht prindërit dhe motrën e tij, përpara se të udhëtonte drejt qendrës së qytetit dhe të hapte zjarr ndaj qytetarëve të rastësishëm.
Nga të dyja ngjarjet raportohet se humbën jetën gjithsej nëntë persona, përfshirë tre anëtarët e familjes së tij.
Trupat e pajetë të prindërve dhe motrës u gjetën në banesën e familjes në një qytet të vendosur rreth 200 kilometra larg Krakovës. Sipas medias polake Onet, duke iu referuar burimeve jozyrtare nga hetimi, 24-vjeçari dyshohet se i vrau ata ndërsa ishin në gjumë.
Viktimat ishin babai 53-vjeçar, nëna 52-vjeçare dhe motra 21-vjeçare. Trupat e tyre u gjetën në shtretërit ku flinin, ndërsa vlerësimet paraprake të hetuesve sugjerojnë se kishin marrë plagë nga armë zjarri në kokë. Fqinjët e përshkruan familjen si një familje të qetë, pa konflikte të dukshme apo incidente që të kishin shkaktuar shqetësim në lagje.
Michal Oksinski kishte marrë mësime për të qenë një mekanik. Fqinjët e kanë përshkruar si një të ri të qetë, i cili i përshëndeste banorët e tjerë dhe nuk kishte shkaktuar probleme. Disa prej tyre kanë deklaruar se nuk kishin vënë re asnjë sjellje të pazakontë që mund t’i bënte të dyshonin se ai ishte i aftë të kryente një sulm të tillë.
Ndërkohë, autoritetet polake po hetojnë edhe prapavijën ideologjike të 24-vjeçarit, ndërsa hetimet po drejtohen nga Antiterrori Polak. Ministri i Brendshëm i Polonisë ka folur për shenja të ndikimit nga ideologjitë e ekstremit të djathtë dhe nacionalizmit ekstrem, duke theksuar se këto elemente janë ende pjesë e hetimit.
Sipas informacioneve paraprake, pasi dyshohet se vrau tre familjarët, Oksinski u largua nga banesa me një automjet të regjistruar në emër të babait të tij dhe u nis drejt Krakovës.
Pak pas orës 15:00 të së shtunës, më 7 nëntor, ai hyri me automjet në sheshin qendror të Krakovës, një nga zonat më të frekuentuara turistike të Polonisë, dhe nisi të qëllonte ndaj kalimtarëve.
Të shtënat shkaktuan panik mes banorëve dhe turistëve, të cilët kërkuan strehim në dyqane, restorante dhe ndërtesat përreth.
Sipas autoriteteve polake, gjashtë persona humbën jetën në sulmin në qendër të qytetit, ndërsa të plagosurit u transportuan drejt spitalit. Mes të plagosurve raportohet se ishin edhe dy efektivë policie.
Policia ndërhyri menjëherë dhe pasoi një shkëmbim zjarri, gjatë të cilit autori u plagos dhe më pas u arrestua. Sipas raportimeve, e gjithë ndërhyrja përfundoi brenda rreth tre minutash nga nisja e sulmit, ndërsa autori i sulmit ndodhet në gjendje të rëndë shëndetësore në spital.
Gjatë kontrolleve në banesën e familjes, autoritetet zbuluan edhe shtatë armë. Policia konfirmoi praninë e tyre në apartament, ndërsa trupat e tre viktimave kishin plagë që fillimisht u vlerësuan si të shkaktuara nga armë zjarri.
Sipas mediave polake, 24-vjeçari kishte leje për mbajtjen e armëve dhe dyshohet se ishte marrë edhe me qitje sportive. Hetuesit po shqyrtojnë nëse ai përdori armë që i përkisnin babait të tij, si dhe po verifikojnë origjinën e armëve që kishte me vete gjatë sulmit në Krakovë.
Deri më tani, autoritetet nuk kanë arritur në një përfundim përfundimtar mbi motivet e masakrës së rëndë, ndërsa këtë të diel në Poloni kanë nisur dy ditë zie kombëtare.
