Zvicër, kundërshtohet për të dytën herë rritja e TVSH-së për financimin e ushtrisë

Propozimi i qeverisë zvicerane për rritjen e Tatimit mbi Vlerën e Shtuar (TVSH) për të financuar shpenzimet ushtarake po përballet me kundërshtime në Parlament.

Dy komisione të Dhomës Kombëtare kanë dalë kundër kësaj mase, duke kërkuar që fondet për ushtrinë të sigurohen nga burime të tjera financiare.

Pas Komisionit të Financave, i cili e kishte kundërshtuar rritjen në fund të tetorit, edhe Komisioni i Politikës së Sigurisë votoi kundër propozimit të qeverisë. Vendimi u mor me 15 vota pro një modeli alternativ të financimit dhe 9 kundër.

Megjithatë, shumica e komisionit pajtohet se ushtria zvicerane ka nevojë për investime shtesë në pajisje dhe armatim, duke i konsideruar ato të domosdoshme për shkak të situatës aktuale të sigurisë.

Për këtë arsye, propozohet krijimi i një fondi për sigurinë dhe mbrojtjen, i cili do të financohej përmes burimeve ekzistuese buxhetore, shkruan Watson.

Sipas modelit alternativ, 400 milionë franga në vit do të siguroheshin nga të ardhurat ekzistuese të TVSH-së, 330 milionë nga kreditë e miratuara por të pashfrytëzuara, ndërsa 200 milionë franga nga kursimet në bashkëpunimin ndërkombëtar.

Po ashtu, propozohet që kantonet të marrin 400 milionë franga më pak në vit nga të ardhurat e tatimit federal të drejtpërdrejtë.

Fondi parashihet të funksionojë për 18 vjet dhe të ketë një vëllim të përgjithshëm prej 24 miliardë frangash.

Ai do të mund të marrë edhe hua deri në 6 miliardë franga për të mbuluar nevojat financiare të projekteve ushtarake.

Ndërkohë, Këshilli Federal kishte propozuar rritjen e normës standarde të TVSH-së me 0.5 pikë përqindjeje për një periudhë 12-vjeçare, ndërsa norma speciale për hotelerinë do të rritej nga 3.8% në 4.3%.