Loading ...
Një zjarr në Laboratorin Kombëtar të Lumit Savannah, në Karolinën e Jugut, SHBA, shkaktoi një rrjedhje të materialit radioaktiv dhe aktivizoi protokollet e emergjencës. Autoritetet konfirmuan se zjarri u shua, ndërsa nuk u raportua ndotje radioaktive jashtë objektit të prekur.
Gjendja e jashtëzakonshme u shpall të mërkurën pasdite, pasi flakët shpërthyen në një nga dhomat e laboratorit. Sipas autoriteteve, incidenti u shoqërua me një rrjedhje radiologjike të pafiltruar në nivelin e tokës.
Pavarësisht incidentit, zyrtarët theksuan se nuk u zbulua radioaktivitet jashtë objektit dhe se nuk kishte tregues për ndikime përtej kufijve të tij.
Si masë paraprake, Administrata Federale e Aviacionit vendosi kufizime të fluturimeve në zonë, ndërsa u mbyllën edhe hyrjet rrugore për trafikun drejt kompleksit. Kufizime u vendosën gjithashtu për trafikun hekurudhor dhe lumor.
Sipas raportimeve të medias lokale WRDW, punonjësit që ndodheshin në zonën e prekur u strehuan në vendet e tyre të punës, në një sektor të laboratorit të njohur si Zona A. Më vonë, atyre iu lejua të largoheshin, ndërsa hyrja në objekt mbeti e kufizuar.
Shkaku i zjarrit, lloji dhe sasia e materialit radioaktiv të çliruar, si dhe nëse ka pasur persona të lënduar, nuk janë bërë ende të ditura.
Gjendja e jashtëzakonshme, e klasifikuar si niveli i dytë më i lartë nga tri kategoritë e parashikuara, u hoq të mërkurën në mbrëmje, pasi zjarri u vu nën kontroll.
Laboratori Kombëtar i Lumit Savannah shtrihet në një sipërfaqe prej rreth 310 miljesh katrorë, në kufirin mes Karolinës së Jugut dhe Xhorxhias.
I themeluar në vitet 1950, kompleksi shërbeu për prodhimin e plutoniumit dhe tritiumit për armë bërthamore gjatë Luftës së Ftohtë. Sot, aktivitetet e tij përqendrohen kryesisht në menaxhimin e materialeve bërthamore, pastrimin e mjedisit dhe kërkimin shkencor.
