Loading ...
Prodhuesi gjerman i makinave do të ndërtojë një fabrikë të re në Georgia, ku synon të prodhojë rreth 200 mijë automjete në vit. Nisja e prodhimit parashikohet në fillim të viteve 2030.
Kompania gjermane Audi, pjesë e grupit Volkswagen, planifikon të investojë 4 miliardë dollarë për ndërtimin e një fabrike të re automobilistike në Shtetet e Bashkuara të Amerikës. Lajmi u bë i ditur nga presidenti amerikan Donald Trump gjatë një aktiviteti të republikanëve në Perry, Georgia, ndërsa drejtori ekzekutiv i Audi-t, Gernot Döllner, konfirmoi planet e kompanisë.
Fabrika e re pritet të ndërtohet në zonën e Macon-it, në shtetin e Georgia-s, dhe të prodhojë rreth 200 mijë automjete në vit. Sipas të dhënave të bëra publike, investimi parashikohet të krijojë rreth 4,500 vende pune.
Döllner deklaroi se kompania synon të prodhojë në SHBA modelet e saj më të mëdha dhe më luksoze SUV, duke theksuar besimin e Audi-t te tregu amerikan dhe angazhimin afatgjatë në këtë vend.
Prodhimi pritet të nisë në fillim të viteve 2030
Sipas planit paraprak, punimet për fabrikën mund të nisin vitin e ardhshëm, ndërsa prodhimi parashikohet të fillojë në fillim të dekadës së ardhshme. Modelet që pritet të montohen në fabrikën e re përfshijnë Audi Q7, Q8 dhe Q9, sipas një përfaqësuesi të qeverisë amerikane cituar nga Reuters.
Audi po shqyrton gjithashtu zgjerimin e prodhimit në Karolinën e Jugut, ku synon të prodhojë rreth 25 mijë automjete në vit për eksport.
Tarifat doganore dhe ndikimi në ekonomi
Njoftimi vjen në një kohë kur administrata amerikane po mbron politikën e saj të tarifave doganore, duke argumentuar se ato nxisin investimet dhe prodhimin vendas.
Mbështetësit e kësaj politike e kanë paraqitur investimin e Audi-t si një shembull të përfitimeve për ekonominë amerikane. Nga ana tjetër, kritikët argumentojnë se tarifat mund të rrisin çmimet e automjeteve dhe të krijojnë pasiguri për bizneset.
Për Audi-n, ndërtimi i një fabrike në SHBA do të përbënte një hap të rëndësishëm në zgjerimin e pranisë industriale në një nga tregjet më të rëndësishme të kompanisë.
