Loading ...
Dy tornado goditën qytetin bregdetar Marsala në Siçilinë perëndimore, në Itali, duke plagosur dhjetëra persona, dëmtuar ndërtesa, përfshirë një shkollë dhe përmbysur makina.
Një sërë videosh u shpërndanë të premten në mëngjes, ku shiheshin dy vorbulla uji që afroheshin nga deti drejt qytetit.
Dhjetëra persona u raportuan të plagosur, me të paktën 11 të shtruar në spital pasi u goditën nga mbeturinat dhe xhamat e thyer. Një 70-vjeçar, i shtruar në spitalin e Mazara del Vallo, raportohet të jetë në gjendje kritike, me fraktura të shumta.
Një shkollë u godit gjithashtu nga erërat e fuqishme, duke lënduar gjashtë fëmijë. Në momentin e goditjes, brenda ndërtesës ndodheshin 273 nxënës, të cilët u evakuuan të gjithë në mënyrë të sigurt. Pamjet me dron treguan dëme të mëdha në shkollë, me dritare të thyera dhe banka e karrige të përmbysura.
Në vitet e fundit, banorët e Italisë jugore janë përballur me paralajmërime për ardhjen e një “medicane”, një stuhi e rrallë mesdhetare me karakteristika të ngjashme me uraganin, e aftë të prodhojë erëra mbi 100 km/h dhe dallgë deri në pesë metra lartësi.
Sistemi i motit u zhvillua mes nxehtësisë intensive mbi Afrikën e Veriut dhe ujërave jashtëzakonisht të ngrohta të Mesdheut. Shkencëtarët kanë paralajmëruar se rritja e temperaturës së detit, e nxitur nga emergjenca klimatike, mund të furnizojë energji shtesë për stuhitë e fuqishme në rajon.
Sipas ekspertëve, temperaturat rekord në Mesdhe kontribuan në stuhinë e pazakontë që mbyti jahtin luksoz Bayesian pranë bregut të Siçilisë në gusht 2024, ku humbën jetën shtatë persona, përfshirë biznesmenin e teknologjisë Mike Lynch dhe vajzën e tij adoleshente.
