Loading ...
Presidenti amerikan, Donald Trump, dhe ministri i Jashtëm izraelit, Gideon Sa’ar, reaguan ashpër menjëherë pas njoftimit për dhënien e Çmimit Nobel për Paqen Navi Pillay-t, duke e akuzuar për qëndrime të njëanshme kundër Izraelit dhe për promovimin e akuzave për gjenocid në Gaza.
Trump e cilësoi vendimin e Komitetit të Nobelit si një turp, duke pretenduar se Pillay mban qëndrime armiqësore ndaj Shteteve të Bashkuara dhe Izraelit. Ai e akuzoi gjithashtu për zhvillimin e një hetimi të njëanshëm ndaj Izraelit.
Nga ana tjetër, ministri i Jashtëm izraelit, Gideon Sa’ar, e cilësoi vlerësimin si instrumentalizim politik të Çmimit Nobel për Paqen, duke e akuzuar Pillay-n për përhapjen e, sipas tij, gënjeshtrave dhe akuzave shpifëse kundër Izraelit.
Në një zhvillim të lidhur me këtë përplasje, Shtetet e Bashkuara njoftuan vendosjen e sanksioneve ndaj Gjykatës Penale Ndërkombëtare (GJPN), institucion ku Navi Pillay ka shërbyer si gjyqtare nga viti 2003 deri në vitin 2012. Sekretari amerikan i Shtetit, Marco Rubio, deklaroi se masat synojnë të ndërpresin transaksionet me gjykatën, të kufizojnë burimet e saj financiare dhe të pengojnë veprimtarinë e saj.
“Presidenti Trump nuk do të lejojë kurrë që Gjykata Penale Ndërkombëtare të ndjekë penalisht amerikanët. Kjo është arsyeja pse sot Shtetet e Bashkuara po vendosin sanksione ndaj Gjykatës Penale Ndërkombëtare. Ne do të ndalojmë transaksionet me këtë gjykatë, duke i ndërprerë burimet financiare dhe duke paralizuar aftësinë e saj për të vepruar kundër nesh.”
Uashingtoni kundërshton prej kohësh hetimet e gjykatës ndaj shtetasve amerikanë, si dhe procedurat ndaj zyrtarëve izraelitë, përfshirë kryeministrin Benjamin Netanyahu. SHBA-ja ka kundërshtuar gjithashtu hetimin e mëparshëm të GJPN-së për krime të dyshuara lufte në Afganistan, ku përfshiheshin edhe veprime të personelit ushtarak amerikan.
