Loading ...
Dhënia e Çmimit Nobel për Paqen Navi Pillay-t ka shkaktuar reagime të forta në arenën ndërkombëtare. Teksa zyrtarë të Bashkimit Evropian dhe të Afrikës së Jugut e kanë përshëndetur vendimin, Izraeli dhe presidenti amerikan Donald Trump kanë reaguar ashpër, duke e akuzuar Pillay-n për qëndrime kundër Izraelit dhe Shteteve të Bashkuara.
Ministri i Jashtëm izraelit, Gideon Sa’ar, e cilësoi vendimin një përpjekje për të përdorur çmimin për të nxitur urrejtjen dhe paragjykimet ndaj Izraelit.
“T’i akordosh Çmimin Nobel për Paqen Pillay-t nuk është një akt drejtësie, por një instrumentalizim grotesk i një çmimi për të legjitimuar urrejtjen dhe paragjykimet kundër Izraelit”, deklaroi Sa’ar, duke shtuar se Komiteti Nobel kishte shpërblyer, sipas tij, “gënjeshtrën më të madhe të shekullit XXI”.
Ai akuzoi gjithashtu Pillay-n se ka kontribuar në atë që e cilësoi si fushatë të vazhdueshme kundër Izraelit dhe në përhapjen e akuzave për gjenocid.
Edhe presidenti amerikan Donald Trump reagoi me tone të ashpra. Ai e cilësoi vendimin një turp për Komitetin Nobel dhe tha se çmimi ka humbur vlerën e tij për shkak të zgjedhjes së Navi Pillay-t.
Trump pretendoi se Pillay ka shprehur urrejtje ndaj SHBA-ve dhe Izraelit, si dhe e akuzoi për mbështetje të terroristëve dhe Hamasit. Ai kritikoi gjithashtu hetimin që lidhej me akuzat për gjenocid ndaj Izraelit. Në të njëjtën kohë, SHBA-të njoftuan sanksione ndaj Gjykatës Penale Ndërkombëtare.
Në krahun tjetër, vendimi është mirëpritur nga disa prej figurave më të rëndësishme evropiane dhe ndërkombëtare. Presidentja e Komisionit Evropian, Ursula von der Leyen, vlerësoi angazhimin e Pillay-t për drejtësinë, paqen dhe të drejtat e njeriut.
Sipas saj, Pillay është përballur me disa nga periudhat më të errëta të historisë, përfshirë aparteidin në Afrikën e Jugut dhe gjenocidin në Ruandë. Von der Leyen theksoi se ajo ka mbrojtur vazhdimisht të përndjekurit, personat e pambrojtur dhe ata që nuk kanë mundësi të ngrenë zërin.
Edhe presidenti i Këshillit Evropian, Antonio Costa, e cilësoi çmimin të merituar, veçanërisht në një kohë kur e drejta ndërkombëtare po përballet me presione të mëdha. Ai nënvizoi se paqja e qëndrueshme mund të arrihet vetëm kur respektohen dinjiteti njerëzor, përgjegjësia dhe shteti i së drejtës.
Për vendimin reagoi edhe presidenti i Afrikës së Jugut, Cyril Ramaphosa, i cili tha se çmimi është një mundësi për të vlerësuar kontributin e Pillay-t në forcimin e paqes, mbrojtjen e dinjitetit njerëzor dhe përhapjen e shpresës.
Ndërkohë, kryeministri spanjoll Pedro Sánchez e përshkroi Pillay-n si një juriste të njohur, e cila ia ka kushtuar jetën luftës kundër pandëshkueshmërisë dhe mbrojtjes së të dobëtëve përballë të fuqishmëve. Ai rikonfirmoi gjithashtu mbështetjen e Spanjës për organizatat ndërkombëtare që punojnë për ruajtjen e paqes.
Raportuesja speciale e OKB-së për Territoret e Pushtuara, Francesca Albanese, e përshëndeti gjithashtu vendimin dhe bëri thirrje që drejtësia të nisë në Palestinë.
Edhe Hamasi e mirëpriti dhënien e çmimit. Përfaqësuesi i lartë i organizatës, Bassem Naim, e cilësoi atë një mesazh shprese për palestinezët, veçanërisht për banorët e Gazës, duke thënë se vendimi tregon se njerëzimi vazhdon t’u rezistojë forcave që, sipas tij, synojnë të dëmtojnë drejtësinë ndërkombëtare.
Reagimet e kundërta tregojnë ndarjet e thella ndërkombëtare lidhur me Izraelin, çështjen palestineze dhe rolin e institucioneve të drejtësisë ndërkombëtare.
