Loading ...Një 27-vjeçar është arrestuar në Kurbin, pas një operacioni policor të koduar “Target”, pasi dyshohet se qarkullonte i armatosur dhe nuk iu bind urdhrit të punonjësve të Policisë për të ndaluar.
Operacioni u finalizua nga Sektori për Krimet e Rënda, në bashkëpunim me Seksionin e Mbështetjes Operacionale në DVP Lezhë dhe Komisariatin e Policisë Kurbin, pas informacioneve për një shtetas që qarkullonte me armë zjarri.
Në pranga ra shtetasi Edmir Xhaferri, 27 vjeç, banues në Mamurras.
Sipas Policisë, i riu u lokalizua në qytetin e Mamurrasit duke qarkulluar me automjet. Sapo ka parë shërbimet e Policisë, ai ka vijuar lëvizjen me shpejtësi, duke përplasur automjetin e shërbimeve të Policisë dhe duke rrezikuar jetën e punonjësve.
Gjatë tentativës për t’u larguar, 27-vjeçari dyshohet se ka hedhur edhe armën e zjarrit që mbante me vete.
Pas disa minutash ndjekjeje, në lagjen “Zef Hoti” në Mamurras, shërbimet e Policisë kanë bërë të mundur kapjen dhe arrestimin e tij.
Gjatë operacionit janë sekuestruar një armë zjarri pistoletë, municion luftarak, automjeti me të cilin qarkullonte 27-vjeçari, si dhe një palë targa.
Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.
