Loading ...
Një burrë që kaloi 41 vjet në pritje të dënimit me vdekje në SHBA, pasi u dënua për vrasjen e një gruaje, është liruar me kusht. 71-vjeçari nga Çikago u lirua me kusht në Utah, pasi prokurorët pranuan se analizat e reja të ADN-së nuk e lidhin atë me krimin.
Douglas Stewart Carter u dënua për vrasjen e Eva Olesen në vitin 1985, e cila ishte tezja e një shefi policie në atë kohë. Gruaja u gjet e vrarë në shtëpinë e saj në Provo të Utah-s, pasi ishte goditur disa herë me thikë dhe ishte qëlluar në kokë. Në atë kohë, policia dyshoi për Carterin, i cili më vonë u arrestua në Tenesi.
Pavarësisht mungesës së provave fizike që e lidhnin me krimin, Carter u dënua me vdekje, kryesisht mbi bazën e rrëfimit dhe dëshmive të dy personave. Por vite më vonë, dëshmitarët ndryshuan versionin. Ata thanë se policia i kishte kërcënuar, u kishte dhënë para dhe dhurata dhe u kishte kërkuar të dëshmonin kundër Carterit.
Gjykata Supreme e Utahut urdhëroi një gjyq të ri, ndërsa avokatët e Carterit ngritën dyshime edhe për mënyrën se si ishte hetuar rasti. Tashmë, prova më e re ERDHI nga ADN-ja. Materiali gjenetik i gjetur në dorezën e derës dhe në dorezën e thikës nuk përputhej me Carterin. Ai u lirua me kusht dhe do të duhet të mbajë me vete një monitor GPS.
Familja e viktimës kundërshtoi lirimin. Ndërsa mbrojtja kërkoi që çështja të rrëzohet, duke argumentuar se Carter rrezikoi të ekzekutohej për një krim që mund të mos e ketë kryer.
Carter do të vendoset në një hotel me qëndrim të zgjatur dhe do të ketë nevojë për terapi për t’u përballur me burgimin e tij të zgjatur.
Një rigjykim dy-mujor ishte planifikuar vitin e ardhshëm, por javën e kaluar prokurorët e qarkut tërhoqën një njoftim se kishin ndërmend të kërkonin dënimin me vdekje.
