Loading ...
Presidenti iranian Masoud Pezeshkian ka deklaruar se Teherani nuk synon të prodhojë armë bërthamore dhe se është i gatshëm të reduktojë nivelin e pasurimit të uraniumit, si dhe të lejojë inspektimet ndërkombëtare.
Në një intervistë për Fox News, Pezeshkian theksoi se Irani nuk kërkon të zotërojë bombë bërthamore. Ai iu referua gjithashtu një dekreti fetar të liderit suprem iranian, sipas të cilit një armë e tillë është e paligjshme. “Jemi të gatshëm ta hollojmë uraniumin. Nuk është problem. Jemi të gatshëm t’i nënshtrohemi verifikimit ndërkombëtar”, u shpreh presidenti iranian.
Pezeshkian foli edhe për memorandumin e mirëkuptimit të nënshkruar në qershor me presidentin amerikan Donald Trump. Sipas tij, Teherani vazhdon të jetë i gatshëm të ecë përpara mbi bazën e këtij dokumenti, i cili parashikonte një proces 60-ditor për arritjen e një marrëveshjeje më të gjerë.
Presidenti iranian akuzoi Shtetet e Bashkuara dhe Izraelin se kanë ndërprerë përpjekjet diplomatike dhe kanë kaluar në veprime ushtarake. Ai tha se Irani nuk synon të vrasë amerikanë, por do të mbrohet në rast se vendi sulmohet.
Sa i përket situatës në Jemen, Pezeshkian mohoi që Irani të ketë kontroll të drejtpërdrejtë mbi lëvizjen Huthi. “Huthit janë përgjegjës për veprimet e tyre dhe nuk marrin urdhra nga ne”, deklaroi ai.
Ndërkohë, lidhur me pretendimet se Irani ka përdorur imazhe satelitore kineze gjatë një sulmi ndaj një baze amerikane në Jordani, ku humbën jetën tre ushtarë amerikanë, Pezeshkian tha se nuk kishte informacion konkret për këtë çështje.
