Loading ...
Rusët me të drejtë vote kanë filluar të votojnë për të zgjedhur deputetët e Dumës së Shtetit, në një kohë kur lufta gati pesëvjeçare në Ukrainë dhe ngadalësimi i ekonomisë po rëndojnë mbi vendin.
Rusia e Bashkuar, partia e lidhur me Kremlinin që mbizotëron Dumën, si dhe parlamentet dhe qeveritë rajonale në mbarë vendin, pritet ta dominojë sërish, pasi vetëm partitë që mbështesin presidentin Putin dhe fushatën ushtarake ndaj vendit fqinj janë regjistruar në zgjedhjet që zgjasin deri më 20 shtator.
Ndërkohë e vetmja parti politike e njohur që kundërshtonte luftën nuk u lejua të merrte pjesë në zgjedhje disa javë para votimit. Që kur presidenti Vladimir Putin erdhi në pushtet, më shumë se çerek shekulli më parë, Kremlini ka mënjanuar gjithnjë e më shumë zërat kundërshtarë.
Zgjedhja dhe vullneti juaj do të tregojnë edhe një herë se miliona njerëz qëndrojnë pas trupave tona, se jemi një popull i bashkuar nga vlerat e përbashkëta, kujtesa historike dhe dashuria për atdheun dhe askush nuk do të arrijë të na përçajë apo frikësojë, ose ta minojë sovranitetin ose sistemin tonë politiko-shoqëror, deklaroi Putin.
Autoritetet ruse që mbështeten nga Kremlini kanë ngritur qendra votimi edhe në pjesët e kontrolluara nga Rusia të pesë rajoneve ukrainase, të cilat Moska i ka shpallur territor rus, ndërmarrje që është dënuar nga Kievi.
Për Kremlinin, zgjedhja e 450 deputetëve në dhomën e ulët të parlamentit, Dumën, është e rëndësishme, pasi ky është procesi i parë elektoral parlamentare që kur Moska nisi pushtimin e Ukrainës në vitin 2022, ndërsa sipas ekspertëve, Kremlini do ta përdorë atë fitore për të pretenduar se shumica e rusëve mbështesin presidentin Putin dhe luftën ndaj vendit fqinj.
