Loading ...
Danimarka ka akuzuar një anije luftarake ruse se ka qëlluar dy raketa sinjalizuese drejt një prej helikopterëve të saj, ndërsa ai po monitoronte anijen në Detin Baltik.
Sipas autoriteteve daneze, incidenti ndodhi të hënën gjatë një operacioni rutinë monitorimi, në ujërat ndërkombëtare pranë Gedserit. Një prej raketave kaloi pranë helikopterit Fennec të Forcave Ajrore Daneze.
Qeveria daneze ka thirrur ambasadorin rus për të kërkuar sqarime lidhur me incidentin. Kryeministrja Mette Frederiksen e cilësoi veprimin rus si “të pamatur”, duke thënë se ai synonte të “frikësonte dhe përçante”.
Ministria e Jashtme daneze e dënoi incidentin si “krejtësisht të papranueshëm”.
Nga ana tjetër, Rusia tha se do ta hetonte me kujdes ngjarjen, por akuzoi helikopterët danezë për kryerjen e “manovrave të rrezikshme” pranë anijeve luftarake ruse.
Incidenti ndodhi në një moment tensioni të shtuar në krahun lindor të NATO-s. Në të njëjtën ditë, forcat e aleancës rrëzuan një dron mbi Lituani, duke shtuar shqetësimet për sigurinë në rajon në kuadër të luftës së Rusisë në Ukrainë.
