Loading ...
Shtetet e Bashkuara kanë konfirmuar publikisht, për herë të parë, se disponojnë një armë të vendosur në orbitën e Tokës.
Sekretari i Forcave Ajrore amerikane, Troy Meink, deklaroi se një armë e vendosur në hapësirë është e nevojshme për mbrojtjen e forcave amerikane nga veprimet armiqësore të kundërshtarëve.
Deklarata u bë në Konferencën për Ajrin, Hapësirën dhe Hapësirën Kibernetike, ku Meink tha se Shtetet e Bashkuara janë të përgatitura për t’u përballur me kërcënimet në zhvillim.
Sipas tij, bëhet fjalë për mjete të afta të ndërpresin, dobësojnë ose, në raste të nevojshme, të shkatërrojnë kapacitetet hapësinore të kundërshtarit.
Zhvillimi vjen në një kohë kur SHBA-të, Rusia dhe Kina po rrisin kapacitetet e tyre hapësinore dhe kundërhapësinore. Satelitët janë thelbësorë për komunikimet ushtarake, navigimin, mbikëqyrjen dhe operacionet e mbrojtjes.
Një traktat ndërkombëtar i vitit 1967 ndalon vendosjen në orbitë të armëve të shkatërrimit në masë, por nuk ndalon të gjitha llojet e armëve hapësinore. Ndërkohë, Uashingtoni ka akuzuar më parë Rusinë dhe Kinën për zhvillimin e teknologjive që mund të përdoren për të sulmuar ose penguar satelitët e vendeve rivale.
