Loading ...
Në New York kanë nisur homazhet për viktimat e sulmeve terroriste të 11 shtatorit 2001, një nga ngjarjet më tragjike në historinë moderne të Shteteve të Bashkuara të Amerikës.
Ceremonitë përkujtimore zhvillohen në vendin ku dikur ngriheshin Kullat Binjake të Qendrës Botërore të Tregtisë, të goditura nga dy avionë të rrëmbyer nga terroristët e rrjetit Al-Kaeda.
Më 11 shtator 2001, katër avionë pasagjerësh u rrëmbyen. Dy prej tyre u përplasën me Kullat Binjake në New York, ndërsa një tjetër goditi Pentagonin, selinë e Departamentit të Mbrojtjes së SHBA-së, pranë Washingtonit.
Avioni i katërt u rrëzua në Pensilvani pasi pasagjerët dhe ekuipazhi tentuan të rimerrnin kontrollin e avionit nga rrëmbyesit.
Sulmet shkaktuan vdekjen e rreth 3 mijë personave dhe ndryshuan në mënyrë të thellë politikën e sigurisë dhe marrëdhëniet ndërkombëtare. Pas sulmeve, Shtetet e Bashkuara nisën një fushatë të gjerë kundër terrorizmit, e cila do të pasohej nga ndërhyrja ushtarake në Afganistan.
Në New York, familjarë të viktimave dhe autoritete vendase mblidhen çdo vit për të nderuar kujtimin e të gjithë atyre që humbën jetën. Gjatë ceremonisë lexohen emrat e viktimave, ndërsa në vendin ku dikur qëndronin kullat tashmë ndodhet memoriali kushtuar të rënëve.
25 vjet pas tragjedisë, 11 shtatori mbetet një datë simbolike për Shtetet e Bashkuara dhe një nga momentet që ka lënë gjurmët më të thella në historinë e shekullit XXI.
