Loading ...
Të paktën 11 palestinezë, përfshirë gra dhe fëmijë, janë vrarë dhe dhjetëra të tjerë janë plagosur si pasojë e sulmeve ajrore izraelite në pjesë të ndryshme të qytetit të Gazës, sipas burimeve mjekësore dhe dëshmitarëve okularë.
Sipas raportimeve, avionët luftarakë izraelitë goditën të paktën katër ndërtesa banimi në lagjet Sheikh Radwan dhe Tel al-Hawa, si dhe në kampin e refugjatëve Shati, në orët e para të mëngjesit të së enjtes. Shpërthimet e fuqishme shkaktuan panik mes banorëve të zonës.
Në videot e publikuara në rrjetet sociale, që pretendohet se tregojnë pasojat e sulmeve, shihen persona që përpiqen të largohen nga një ndërtesë e përfshirë nga flakët në kampin Shati.
Ushtria izraelite nuk ka dhënë ende një koment zyrtar lidhur me sulmet. Dëshmitarët thanë se tre helikopterë izraelitë u panë duke fluturuar për pak kohë mbi vijën bregdetare të qytetit të Gazës, përpara se të kryenin sulme të njëkohshme ndaj objektivave.
Sipas raportimeve, një nga objektivat ishte Hassan Labad, komandant i Hamasit në veri të Gazës, i cili u vra së bashku me bashkëshorten dhe tre nga fëmijët e tij.
Një zëdhënës i Agjencisë së Mbrojtjes Civile të drejtuar nga Hamasi tha se mes viktimave ndodheshin edhe dy fëmijë me aftësi të kufizuara nga familja Labad dhe tre gra.
Izraeli ka vazhduar sulmet ajrore në Rripin e Gazës pavarësisht armëpushimit të ndërmjetësuar nga SHBA-ja, duke akuzuar Hamasin se po riarmatoset dhe po rindërton kapacitetet e tij ushtarake. Sipas Ministrisë së Shëndetësisë në Gaza, e drejtuar nga Hamasi, më shumë se 940 persona janë vrarë që nga hyrja në fuqi e armëpushimit tetorin e kaluar.
Ndërkohë, kriza humanitare në Gaza vazhdon të përkeqësohet. Raportimet flasin gjithashtu për plane të Izraelit për të zgjeruar zonat që kontrollon në territor deri në 70%.
Lufta në Gaza nisi pas sulmit të udhëhequr nga Hamasi ndaj Izraelit jugor më 7 tetor 2023, ku u vranë rreth 1 mijë e 200 persona dhe 251 të tjerë u morën peng. Në përgjigje, Izraeli nisi një ofensivë ushtarake në Gaza, ku sipas autoriteteve shëndetësore lokale janë vrarë mbi 72 mijë e 950 persona.
