Loading ...Gjatë javës që lamë pas, Policia e Tiranës ka shtuar kontrollet dhe operacionet në terren kundër lojërave të fatit të paligjshme. Aksionet janë përqendruar kryesisht në disa zona problematike të kryeqytetit, ku janë evidentuar dhe goditur ambiente të përshtatura posaçërisht për zhvillimin e kësaj veprimtarie të jashtëligjshme.
Sipas burimeve zyrtare, ambiente të ndryshme, kryesisht lokale shfrytëzoheshin nga pronarët dhe administratorët. Në këto hapësira ishin vendosur makineta elektronike si dhe tavolina për lojëra pokeri.
Vetëm gjatë një jave, strukturat e Policisë së Tiranës kanë ndërhyrë në nëntë raste të ndryshme, të shtrira në zonat e Astirit, Kombinatit dhe në disa zona të tjera përreth. Si rezultat i këtyre operacioneve, janë arrestuar gjashtë persona, të cilët në pjesën më të madhe rezultojnë të jenë pronarë apo administratorë të lokaleve ku zhvillohej aktiviteti i paligjshëm.
Ndërkohë, policia ka shpallur në kërkim edhe dy persona të tjerë, të dyshuar si të përfshirë në organizimin dhe menaxhimin e këtyre ambienteve. Hetimet vijojnë për të identifikuar persona të tjerë të mundshëm të implikuar, si dhe për të dokumentuar plotësisht këtë veprimtari kriminale.
