Loading ...
Ministri italian i Punëve të Jashtme, Antonio Tajani ka bërë të ditur se i ka kërkuar Kinës të rrisë përpjekjet për t’i dhënë fund luftës në Ukrainë dhe të përdorë ndikimin e saj mbi Moskën për të shtyrë drejt negociatave serioze.
Në një intervistë për gazetën italiane “il Giornale” gjatë vizitës së tij në Pekin, Tajani tha se e ka ngritur drejtpërdrejt këtë çështje me homologun e tij kinez, Wang Yi, duke theksuar nevojën për një rol më të fortë të Kinës në mbështetje të paqes dhe stabilitetit në Ukrainë.
“E kam kërkuar në mënyrë eksplicite nga ministri i jashtëm Wang Yi që Pekini të mbështesë fuqimisht përpjekjet për të sjellë paqe dhe stabilitet në Ukrainë. Shpresoj që Kina të bëjë më shumë për të bindur Putinin të negociojë seriozisht”, tha Tajani.
Kryediplomati italian mbërriti në Pekin dje për pjesën e parë të vizitës së tij në Kinë, e cila sot do të vazhdojë edhe në Shangai. Ai foli për tensionet në Lindjen e Mesme, përfshirë Iranin, Ngushticën e Hormuzit dhe Libanin, duke theksuar se armëpushimet e përkohshme mund të ndihmojnë në hapjen e rrugës për marrëveshje më të gjera paqeje.
“Për t’u dhënë fund këtyre luftërave, së pari duhet të konsolidojmë armëpushime që mund të çojnë në kushte më të qëndrueshme paqeje”, tha ai duke shtuar se një armëpushim i propozuar 10-ditor në Liban do të ishte “rruga e duhur për një fillim të ri në Lindjen e Mesme”.
Lidhur me Iranin, Tajani shprehu shpresë të kujdesshme për një mirëkuptim të qëndrueshëm mes SHBA-së dhe Iranit, si dhe paralajmëroi për pasojat ekonomike të paqëndrueshmërisë së vazhdueshme, veçanërisht për tregjet e energjisë dhe bujqësisë.
“Shpresoj që të funksionojë, për sigurinë e shumë civilëve të pafajshëm dhe për një rimëkëmbje ekonomike globale. Po paguajmë një çmim shumë të lartë”, tha ai.
Ministri italian gjithashtu rikonfirmoi mbështetjen për integrimin e mbrojtjes evropiane brenda NATO-s, duke hedhur poshtë spekulimet për tërheqje të madhe të trupave amerikane nga Evropa si “joreale”.
