Loading ...
Tre javë pas nisjes së luftës së përbashkët SHBA-Izrael kundër Iranit, situata në terren mbetet e paqartë, ndërsa mesazhet kontradiktore nga Donald Trump po shtojnë konfuzionin mbi drejtimin e konfliktit.
Presidenti amerikan ka deklaruar se lufta është “pothuajse e përfunduar”, por në të njëjtën kohë SHBA po dërgon forca të reja tokësore në rajon, përfshirë një njësi ekspedicionare të marinsave. Ndërkohë, edhe pse ai e ka cilësuar konfliktin si “në zbehje”, sulmet ajrore dhe me raketa ndaj objektivave iraniane vijojnë pa ndërprerje.
Një tjetër pikë kritike mbetet Ngushtica e Hormuzit – korridor strategjik përmes të cilit kalon rreth 20% e naftës globale. Trump e ka përshkruar hapjen e saj si një “manovër të thjeshtë ushtarake”, por aktualisht vetëm anijet e miratuara nga Irani po qarkullojnë në këto ujëra.
Edhe pse presidenti ka deklaruar se ushtria iraniane është “shkatërruar”, sulmet me dronë dhe raketa vazhdojnë në rajon, duke arritur deri te baza e përbashkët SHBA-MB në Diego Garcia.
Në një postim të fundit në platformën Truth Social, Trump paralajmëroi për një përshkallëzim të ri: nëse Irani nuk e hap plotësisht Ngushticën e Hormuzit brenda 48 orëve, SHBA do të nisë goditjet ndaj centraleve elektrike iraniane, “duke filluar nga më të mëdhatë”.
Megjithatë, vetëm një ditë më parë, ai kishte publikuar një listë me objektivat ushtarake të SHBA-së në këtë konflikt, duke theksuar se Uashingtoni është “shumë pranë” arritjes së tyre. Këto përfshijnë shkatërrimin e ushtrisë iraniane, infrastrukturës mbrojtëse dhe programit bërthamor, si dhe mbrojtjen e aleatëve në rajon.
Në mënyrë domethënëse, sigurimi i Ngushticës së Hormuzit nuk ishte pjesë e këtyre objektivave. Trump ka argumentuar se kjo duhet të jetë përgjegjësi e vendeve që varen më shumë nga nafta e Gjirit, duke theksuar se SHBA është eksportuese neto energjie. Megjithatë, ekspertët vënë në dukje se tregu global i energjisë bën që çdo luhatje çmimesh të ndikojë drejtpërdrejt edhe tek konsumatorët amerikanë.
Situata mbetet e tensionuar, ndërsa deklaratat dhe veprimet në terren vazhdojnë të japin sinjale të kundërta për të ardhmen e konfliktit.
