Loading ...TIRANË– Kryeministri Edi Rama ka reaguar ashpër pas kërkesës së Prokurorisë së Specializuar në Hagë, e cila kërkoi dënimin me 45 vite burg të ish-Presidentit të Kosovës, Hashim Thaçi, si dhe të tre ish-udhëheqësve të tjerë të Ushtrisë Çlirimtare e Kosovës; Kadri Veseli, Jakup Krasniqi dhe Rexhep Selimi.
Ai e cilësoi kërkesën për 45 vite burg për secilin prej tyre si një “çmenduri” dhe “mizori”, duke theksuar se bëhet fjalë për figura domethënëse të Luftës Çlirimtare të Kosovës.
Sipas tij, kërkesa e Prokurorisë përbën një goditje të rëndë për popullin e Kosovës dhe për vetë Republikën e Kosovës.
Rama theksoi se, sipas tij, nuk mund të ketë dënim pa prova të qarta për ekzistencën e një plani të organizuar për të sulmuar civilët, apo pa vërtetimin se udhëheqësit kanë dhënë urdhra të drejtpërdrejtë për kryerjen e veprave penale. Ai shtoi se nuk mund të dënohet një drejtues i një lufte çlirimtare vetëm për shkak të pozitës që ka mbajtur, pa u provuar përgjegjësia konkrete individuale.
Kryeministri e ka konsideruar procesin si të padrejtë dhe të papranueshëm.
“Prokuroria e Hagës kërkoi 45 vite burg për Hashim Thaçin dhe për secilin prej tre udhëheqësve të tjerë të Ushtrisë Çlirimtare të Kosovës, Kadri Veselin, Jakup Krasniqin dhe Rexhep Selimin. Mu desh dhe më duhet sinqerisht, më duhet kohë të kuptoj se si mund të përballet një gjë e tillë, një çmenduri e tillë, një paturpësi e tillë, një mizori e tillë, me fjalë.
Kërkesa për 45 vite burg për të katër figurat domethënëse të Luftës Çlirimtare, ishte një bombë e hedhur mbi popullin dhe mbi Republikën e Kosovës. Një prokurori krejt e padenjë, e cila për të marrë në shqyrtim historinë e përgjakshme të Luftës Çlirimtare të Kosovës bëri gjashtë vite hetim dhe doli me pretendimin se gjatë viteve ‘98-99, qenkan kryer krime kundër njerëzimit dhe krime luftës ndaj civilëve. Por nuk ka asnjë ligj ndërkombëtar, që lejon dënime mbi pretendime të tilla dhe pa asnjë provë të qartë se ekziston një plan dhe një forcë e organizuar për të sulmuar dhe për t’u marrë jetën civilëve si të tillë, pse janë civilë.
Po ashtu, nuk ka asnjë lloj ligjësie dhe asnjë ligj ndërkombëtar që i hap rrugën dënimit të një udhëheqësi në një luftë çlirimtare, vetëm se ka qenë udhëheqës. Ama, pa provuar se ka dhënë urdhëra për të sulmuar civilët, se ka pasur kontroll real mbi të gjitha formacionet luftarake në territor të një ushtrie çlirimtare në emër, por të një tërësie forcash të bashkuara nga i njëjti ideal dhe qëllim, por jo në të njëjtin organizim në territor apo se ka pasur ndonjë lidhje tjetër drejtpërdrejtë me vepra penale të kësaj ububushmërie. Dhe ajo farë prokurorie dështoi të sillte, qoftë në një provë të vetme për ta mbështetur këtë kërkesë mizore pas gjashtë a pak a shumë gjashtë vitesh hetime e mbështetur nga një zinxhir shtetesh demokratike, të cilat duhet të ndjehen të turpëruara nga një maskaradë e tillë. Ky nuk është një turp për ca prokurorë, për atë farë idioti ndërkombëtar që dilte dhe lexonte broçkulla. Ky është një turp për shtetet që e mbështesin atë gjykatë, që e paguajnë atë gjykatë, që mundësojnë rroga marramendëse për personazhe të kësaj injorance dhe njëkohësisht dhe të kësaj .. nuk di çfarë të them, nuk di çfarë të them.”, tha Rama./abcnews.al
