Loading ...Qytetarët e Kosovës i drejtohen këtë të diel për herë të katërt kutive të votimit, në fund të një viti të gjatë krize politike.
Procesi i votimit ka nisur në 948 qendra të votimit dhe sipas listës numri i qytetarëve me të drejtë vote është mbi 1 milion e 999 mijë, të shpërndarë në 38 komuna.
Në këto zgjedhje janë të certifikuara për pjesëmarrje 24 subjekte politike, prej të cilave: 18 parti, 3 koalicione, 2 iniciativa qytetare dhe 1 kandidatë të pavarur.
Ndërkohë numri i përgjithshëm i kandidatëve të certifikuar për pjesëmarrje në zgjedhjet e parakohshme është 1,180 kandidatë.
Procesi i votimit ka shkuar i qetë, ndërsa në Mitrovicën e Veriut, siç ka ndodhur edhe në zgjedhjet e kaluara, Lista Serbe dhe qytetarët serbë shkuan në grup për të votuar.
Votimi kolektiv është një praktikë që serbët në veri të Kosovës e kanë ndjekur në çdo pjesëmarrje në zgjedhje.
Këto janë zgjedhjet e dyta parlamentare që mbahen brenda një viti në Kosovë, pas tentativave të dështuara për të formuar një qeveri të re që nga zgjedhjet e shkurtit.
Kuvendi i Kosovës ka 120 mandate dhe për të formuar qeverinë janë të nevojshme 61 vende.
Në garë për postin e Kryeministrit janë Bedri Hamza nga Partia Demokratike e Kosovës, Lumir Abdixhiku nga Lidhja DEMOKRATIKE E Kosovës, Ramush Haradinaj nga Aleanca për Ardhmërinë dhe Vetëvendosje kandidon sërish me Albin Kurtin, më të cilin askush nuk pranoi të bashkëpunonte për të formuar qeverinë.
Këto zgjedhje janë të një rëndësie të madhe për ta nxjerrë vendin nga ngërçi i një viti të gjatë. 9 muaj pa qeveri dhe institucione krijuan problematika për qytetarët dhe nëse një skenar i tillë do të vazhdonte edhe pas dhjetorit, situata mund të përkeqësohej.
Rëndësi të veçantë këtyre zgjedhjeve u jep edhe fakti që vitin e ardhshëm në Kosovë zgjidhet presidenti i ri dhe nëse edhe ky proces dështon, qytetarët do ishin sërish të detyruar t’u drejtoheshin kutive të votimit. / abcnews.al /
