Loading ...TIRANË- Pasi tre gjyqtarët nuk arritën unanimitet të martën për të vendosur kalimin apo rrëzimin e padisë së kryeministrit për cështjen Balluku, Gjykata Kushtetuese shtynë me mbi një javë Mbledhjen e Gjyqtarëve.
Kjo mbledhje qe pritej te mbahej të enjten e kësaj jave, është shtyrë për të premten e javës së ardhshme, datë 12 dhjetor.
Arsyet e shtyrjes janë disa, siç ka njoftuar zyrtarisht Gjykata Kushtetuese.
“Gjykata informon se shqyrtimi paraprak i çështjes nga Mbledhja e Gjyqtarëve do të bëhet në datën 12.12.2025 për shkak të kompleksitetit të çështjes, volumit të materialeve shoqëruese, agjendës së Gjykatës si dhe mbështetur në kërkesën e disa prej anëtarëve të saj”
Kreu i qeverisë e ka cuar padinë më 21 nëntor dhe Gjykata Kushtetuese në mbledhjen e datës 12 do të duhet të vendos për fazën e parë të saj; nëse do e pranojë për ta shqyrtuar në themel në vijim apo do të rrëzojë atë.
Gjyqtarët kushtetues kanë kërkuar kohë, duke e argumentuar këtë me kompeksitetin e çështjes dhe volumit të materialeve të dosjes.
Po në mbledhjen e së premtes, nëse gjyqtarët vendosin se cështja është objekt me natyrë kushtetuese, do të duhet të marrin vendim dhe për kërkesën tjetër; atë të heqjes së pezullimit për numrin 2 të qeverisë, Belinda Balluku.
Vetë Rama e ka përsëritur se pezullimi i zv.kryeministres dhe ministres së Infrastrukturës dhe Energjisë ka penguar veprimtarinë e institucioneve, ndërsa ai në padinë e tij ka kerkuar shfuqëzimin e pezullimit të vendosur nga Gjykata e Posacme, duke thënë se cënon garancinë e imunitetit të anëtarit të Këshillit të Ministrave dhe parimin e ndarjes së pushteteve dhe kompetencat e organeve.
/abcnews.al
