Autoritetet e Tajvanit njoftuan të premten se kishin parë 41 avionë ushtarakë kinezë dhe anije luftarake rreth ishullit, një lëvizje vjen pas njoftimit se presidenti i Tajvanit Lai Ching-te do të bëjë një turne në Hawai.
Ministria e Mbrojtjes e Tajvanit tha se zbuloi 33 avionë dhe tetë anije të forcave të armatosura të Kinës në 24 orë në hapësirën e saj ajrore dhe ujërat territoriale. Kjo është forca më e madhe e dislokuar në tre javët e fundit rreth ishullit, të cilin Pekini e konsideron një provincë kineze.
Taipei gjithashtu raportoi se kishte vërejtur një balonë, e katërta që nga e diela, rreth 172 kilometra në perëndim të ishullit.
Vitet e fundit, Kina ka rritur aktivitetin e saj ushtarak rreth ishullit për të ushtruar presion mbi Taipei. Ajo vendos pothuajse çdo ditë luftëtarë, bombardues, drone dhe anije luftarake rreth Tajvanit.
Turne me ndalesa në Hawaii dhe Guam
Lai Ching-te, një mbrojtës i hapur i sovranitetit kombëtar të Tajvanit, niset të shtunën për një turne në Ishujt Marshall, Tuvalu dhe Palau, të vetmet kombe të Paqësorit midis 12 aleatëve të mbetur të Taipeit.
Gjatë turneut, Lai Ching-te, në pushtet që nga maji, do të kalojë dy netë në Hawaii dhe një tjetër në Guam, ku do të takohet me “miq të vjetër” dhe “anëtarë të grupeve të mendimit”, tha ai.
Zyrtarët tajvanezë bëjnë ndalesa rregullisht në tokën amerikane në udhëtimet e tyre në vendet e Paqësorit dhe Amerikës Latine, një lëvizje që është pritur vazhdimisht me indinjatë në Pekin.
Paraardhësi i Lai Ching-te, Tsai Ing-wen, bëri ndalesa në Hawaii dhe Guam në vitin 2017./abcnews.al
