Pjesa e parë e ditës do të sjellë në vendin tonë intervale të gjata me kthjellime, të cilat më të dukshme pritet të jenë përgjatë vijës bregdetare. Ndërsa në pjesën tjetër të territorit do të ketë dhe kalime të pakta të vranësirave. Por parashikohet që vranësirat të theksohen në orët e mesditës dhe pasdites në një pjesë të mirë të Shqipërisë, duke bërë që pjesërisht në zonat Lindore të krijojnë mundësi për shira të pakët e të karakterit lokal.
Pritet që orët e mbrëmjes dhe natës vonë të sjellin përmirësim gradual të kushteve të motit në këto zona. Temperaturat e ajrit do të rriten në vlerat minimale, por ulen lehtë maksimalet duke luhatur vlerat ditore nga 18°C vlera më e ulët deri në 37°C vlera më e lartë në territor.
Era do të fryjë mesatare në tokë dhe deri e fortë në det duke arritur shpejtësinë 45 km/h nga drejtimi Verior – Veriperëndimor, për pasojë në brigjet e Adriatikut dhe Jonit do të gjenerohet dallgëzim 3 – 4 ballë.
Kosova
Kosova gjatë paradites parashikohet të mbetet i gjithë territori me alternime kthjellimesh dhe kalime të pakta të vranësirave, ku kthjellimet më të dukshme do të jenë në zonat Jugore. Ndërsa vranësirat më të theksuara do të jenë në zonat Perëndimore dhe Veriore. Por pritet që në pjesën e dytë të ditës vranësirat të shtohen në Kosovë duke krijuar mundësi për momente të pakta me pika shiu në zona të izoluara në Veri dhe Perëndim të territorit të Kosovës. Temperaturat e ajrit do të vijojnë të rriten lehtë në mëngjes, por do të ulen në mesditë duke luhatur vlerat ditore nga 17°C deri në 34°C. Era do të fryjë mesatarisht me shpejtësi deri në 30 km/h përgjatë gjithë ditës nga drejtimi Verior.
Maqedonia e Veriut
Republika e Maqedonisë së Veriut në pjesën e parë të ditës do të jetë nën mbizotërimin e intervaleve të gjata me kthjellime dhe kalimeve të pakta të vranësirave. Vranësirat më të dukshme do të jenë në zonat Lindore të Maqedonisë së Veriut. Por pritet që në orët vijues vranësirat të shtohen në të gjithë vendin duke u theksuar në zonat Jugperëndimore gjatë orëve të pasdites, ku edhe parashikohet të sjellin momente të pakta me pika shiu në zona të izoluara. Për sa i përket temperaturave e ajrit do të rriten në vlerat minimale, por ulen lehtë maksimalet duke luhatur vlerat ditore nga 17°C vlera minimale deri në 36°C vlera maksimale në rang vendi. Ndërkohë era do të fryjë mesatare përgjatë gjithë ditës duke arritur shpejtësinë maksimale 33 km/h nga drejtimi Verior.
Europa
Alpet e Europës dhe pjesërisht gadishulli Iberik parashikohet të jenë nën ndikimin e motit të vranët, ku vranësirat herë pas here do të zhvillohen dhe do të gjenerojnë në këto rajone rrebeshe shiu. Po ashtu me vranësira të shumta dhe reshje shiu paraqiten vendet nordike dhe ishujt britanik. Ndërsa pjesa tjetër e kontinentit Europian do të jetë nën mbizotërimin e masave ajrore të qëndrueshme duke bërë që Europa Lindore dhe qendrore të jenë me alternime kthjellimesh dhe kalime vranësirash. Gjithashtu me intervale të gjata me kthjellime dhe vranësira të pakta pritet të jetë Juglindja e kontinentit, ku më të dukshme kthjellimet do të jenë në brigjet e Egjeut./abcnews.al
