SHQIPËRI- Parku Natyror Korab-Koritnik , i cili ka një peizazh të jashtëzakonshëm, po vizitohet gjithnjë e më shumë nga shqiptarë dhe të huaj.
Kryeministri i Shqipërisë, Edi Rama ndau sot në rrjetet sociale pamje nga peizazhet e parkut natyror Korab-Koritnik. Kjo zonë konsiderohet si një prej perlave të zonave tona të mbrojtura, që në muajt e parë të vitit kanë pritur plot 800 mijë vizitorë.
Parku Korab-Koritnik ka 25 monumente natyrore (kategoria e tretë e zonave të mbrojtura në Shqipëri). Maja e malit të Korabit, më i larti në Shqipëri, ka një bukuri të rrallë.
Përveç tij ka edhe kreshta të tjera vargmali, me formacione gëlqerore dhe gipsi, mbuluar me bimë barishtore dhe kullota alpine, me lloje të ndryshme lulesh plot aromë gjatë pranverës dhe verës.
Burimet e ftohta të ujit, liqenet natyrore, majat e maleve mbuluar me borë, ofrojnë mundësi të mëdha për të shijuar çdo detaj të turizmit malor, dimër dhe verë.
