Pas vajzës Hygerta Meta, për vrasjen e 50-vjeçarit Pëllumb Meta, policia e Durrësit ka vënë në pranga pasditen e së premtes edhe djalin e madh të të ndjerit. Gazetari i ABC News, Leonidha Musaj raporton se 25 vjeçari Hysen Meta është arrestuar pasi ka ndihmuar të motrën për të fshehur trupin.
Nuk dihet nëse ka qenë ai që ka shkrepur armën apo vajza. Gazetari raportoi më herët se policia kishte gjetur gjurmë gishtërinjsh në qesen me të cilën ishte mbështjellë viktima.
“Është arrestuar pasditen e sotme, vëllai i madh i 19 vjeçares, Hysen Meta, 25 vjeç. Sipas informacioneve të mia, bëhet fjalë për një arrestim por nuk është konfirmuar ende nëse është ky personi që ka shkrepur armën apo vajza. Por është arrestuar pasi ka fshehur kufomën së bashku me motrën 19 vjeçare. Policia pak çaste më vonë do të dalë edhe në një konferencë për shtyp për të hedhur më tepër dritë rreth kësaj ngjarjeje të rëndë”, raportoi gazetari./abcnews.al
