Presioni mbi presidenten hungareze Katalin Novak po rritet për të dhënë dorëheqjen pasi u zbulua se ajo fali një burrë të dënuar për bashkëpunim në abuzimin seksual të fëmijëve.
Partitë opozitare në Hungari kanë njoftuar se Novak, nuk ka më të drejtë të jetë presidente, pasi vitin e kaluar ajo fali një të dënuar, ish-zëvendësdrejtorin e një qendre shtetërore për fëmijë.
Në vitin 2018, ai u dënua me më shumë se tre vjet burg për ndihmën për të mbuluar faktin se drejtori i atij institucioni ka abuzuar seksualisht të paktën dhjetë fëmijë nga viti 2004 deri në vitin 2016, për të cilin më pas u dënua me tetë vjet burg.
Novak, i cili e fali atë, si dhjetëra të tjerë, me rastin e vizitës së Papa Françeskut në Hungari në prill 2023, mohoi se ajo kishte vepruar në mënyrë të pahijshme.
Partia më e madhe opozitare në Hungari, Koalicioni Demokratik, ka nisur një procedurë etike ndaj presidentes në Parlament. Ndërsa, një protestë kundër Novakut është planifikuar për të premten përpara Pallatit Presidencial në Budapest./abcnews.al
