Seanca konstituive e Kuvendit të Serbisë, ku u konfirmuan mandatet e deputetëve të përbërjes së re, kaloi me fishkëllima nga opozita. Deputetët e opozitës ishin para foltores me pankarta ku shkruhej “I keni vjedhur zgjedhjet” dhe “Hajdutë kthejini mandatet”.
Lista e opozitës Serbia kundër dhunës pretendon se zgjedhjet e dhjetorit ishin të parregullta, gjë që pushteti e refuzon. Për shkak të akuzave për vjedhje zgjedhore, deputetët e koalicionit Serbia kundër dhunës e kanë bërë betimin në korridorin e Kuvendit dhe jo në sallë.
Deputeti i koalicionit Serbia kundër dhunës, Radomir Lazoviç, ka vlerësuar se ndërprerja e seancës konstituive është “fitore” e opozitës. Deputetja e kësaj liste, Marinika Tepiç, deklaroi në korridorin e Kuvendit se policia në sallë i ka ndarë deputetët e opozitës nga deputetët e shumicës qeverisëse.
Para tyre këtë e kanë bërë deputetët e koalicionit të djathtë Shpresa, i cili përbëhet nga Partia e Re Demokratike e Serbisë dhe Lëvizja për Rimëkëmbjen e Mbretërisë së Serbisë.
Në vazhdim të seancës së parë, e cila nuk duhet të jetë në të njëjtën ditë, deputetët duhet të zgjedhin kryetarin dhe nënkryetarët e Kuvendit, të emërojnë sekretarin e përgjithshëm, të zgjedhin anëtarët e trupave punues, si dhe anëtarët e përhershëm të delegacioneve parlamentare në institucionet ndërkombëtare. Në zgjedhjet e jashtëzakonshme të dhjetorit, mandatet i fituan 10 lista zgjedhore, pesë prej të cilave janë pakicë.
Partia Progresive Serbe (SNS) me partnerët e saj të koalicionit do ta ketë shumicën në Kuvend. Lista e saj zgjedhore, Aleksandar Vuçiç – Serbia nuk duhet të ndalet, fitoi 129 nga gjithsej 250 mandate deputetësh. Për të pasur shumicën parlamentare kërkohen 126 mandate.
I dyti për nga numri i ulëseve në Kuvend është koalicioni opozitar Serbia kundër dhunës, me 65 mandate. Më pas është lista zgjedhore Ivica Daçiç – kryeministër i Serbisë, me 18 mandate dhe koalicioni i djathtë Shpresa për Serbinë, dhe lista e djathtë dhe pro-ruse Ne – Zëri i Popullit, do të ketë 13 deputetë secili.
Nga partitë e pakicës, Partia e Hungarezëve të Vojvodinës fitoi gjashtë mandate. Listat zgjedhore të Usama Zukorliqit dhe Partisë së Veprimit Demokratik do të kenë nga dy mandate, ndërsa Lufta Politike e Shqiptarëve vazhdon, dhe Partia Ruse, nga një mandat.
Të rinjtë u mblodhën para Kuvendit për t’ë përshëndetur deputetët dhe për t’u treguar mendimin e tyre për “parregullsitë zgjedhore”. Ata mbanin maska lepuri dhe lakër për simpatizantët, duke thënë se lista e votuesve është si lakra.
Seanca konstituive e Kuvendit të Serbisë është mbajtur dy ditë para votimit të paraparë të rezolutës në Parlamentin Evropian për zgjedhjet në Serbi. Parlamenti Evropian, i cili kishte një mision vëzhgues në zgjedhjet në Serbi, diskutoi për këto zgjedhje më 17 janar.
Rezolutat e Parlamentit Evropian nuk janë detyruese. Koalicioni opozitar Serbia kundër dhunës, ka kërkuar që seanca konstituive e Kuvendit të Serbisë të mbahet pas datës 8 shkurt, kur deputetët e Parlamentit Evropian do të shpallin zgjedhjet e dhjetorit në Serbi.
Raportet e organizatave monitoruese vendore dhe ndërkombëtare, përfshirë misionin e Organizatës për Siguri dhe Bashkëpunim në Evropë (OSBE), tregonin se kishte parregullsi zgjedhore në zgjedhjet e 17 dhjetorit në Serbi. SNS-ja në pushtet dhe udhëheqja shtetërore i kanë hedhur poshtë këto akuza.
Më 18 dhjetor, Zyra e OSBE-së për Institucione Demokratike dhe të Drejtat e Njeriut (ODIHR) njoftoi se zgjedhjet u përcollën me parregullsi, keqpërdorim të fondeve publike, dominim mediatik nga presidenti i shtetit Aleksandar Vuçiq, fushata negative dhe përhapje frike./REL/
